सकारात्मक सोचया अभियन्तालिसे अन्तक्र्रिया
यल- ताम्रकार समाजया ग्वसालय् सकारात्मक चिन्तनया अभियन्ता कर्ण शाक्यया अनुभवयात कयाः समाजया थःगु हे भवनय् छगू अन्तक्र्रिया ज्याझ्वः जुल । उगु अन्तक्र्रिया समाजया व्यवसाय विकास उपसमिति व युवा तथा खेलकुद उपसमितिया ग्वसालय् जूगु खः ।
सकारात्मक चिन्तन अभियन्तालिसें उद्यमि नापं च्वमि शाक्यं विदेश ज्या यायेत वन धाःसा च्यः जुक जुइगुलिं मालिक जुयाः ज्या यायेगु खःसा थःगु हे देशय् च्वनाः ज्या याये फइगु व उकिया निंतिं आपालं सम्भावना दुगु खँ कनादिल । वातावरणविद्लिसें संरक्षणविदकथं नं म्हसिउम्ह शाक्यं मनूया दिमाग समुद्रया जाः स्वयां नं तजाः जूगु व सकारात्मक रुपं मन्थन याये फत धाःसा फक्व अप्वः लबः काये फइ धयादिल ।
‘मनू जुयाः जन्म काये धुंकाः समस्या खनाः बिसिउँ वने फइमखु, बरु समस्याया सामना याये फत धाःसा जक उकिया समाधानया लँपु व उपाय नं पत्ता लगे याये फइ’, वय्कलं धयादिल, ‘मनू सफल अलग व फरक प्रकृतिया ज्यापाखें जक जुइ । उकिया निंतिं याःगु ज्याय् लगाव, झुकाव, ज्याप्रति मतिना दत धाःसा जीवन नं सार्थक जुइ ।’
समाजया अध्यक्ष रवीन्द्रराज ताम्रकारं शाक्यया अनुभव वर्तमान नेपाःया परिवेशय् सहयोगी जुइ फइ धासें वय्कःया अभियानय् समाजं नं छपा अपा तने खंगु खँय् लसता प्वंकादिल ।
अन्तक्र्रियाय् पिदंगु न्ह्यसः व जिज्ञासायात कयाः अभियान्ता शाक्यं लिसः बियादीगु ज्याझ्वलय् यलया थीथी समाजया नायः, पदाधिकारीलिसें समाजया दुजःपिनिगु उपस्थिति दुगु खः । ज्याझ्वलय् समाजया उपमहासचिव विमल ताम्रकारं सुभाय् देछानादीगु खः ।
LEAVE YOUR COMMENTS