रिया चक्रवर्तिविरुद्ध चार्जसिट

एजेन्सी- भारतया लागू वासः नियन्त्रण ब्यूरो (एनसीबीं) बलिउड अभिनेता सुशान्त सिंह राजपूत मामिलाय चार्जसिट दर्ता याःगु दु । थ्व चार्जसिटय् राजपूतया प्रेमिका धयातःम्ह रिया चक्रवर्तिं राजपूतयात लागू वासः बिइगु यानाच्वंगु गम्भीर द्वपं बियातःगु दु ।

द हिन्दूं च्वःगु खबर कथं चार्जसिटय् चक्रबर्तिं लागू वासः न्यानाः राजपूतयात बीगु खँ न्ह्यथनातःगु दु । राजपूतं निदँ न्ह्यः जून १४ य् आत्महत्या याःगु खः । उबलय् चक्रवर्तियात आत्महत्याया दुरुत्साहन याःगु द्वपनय् ज्वंगु नं खःसा अदालतं वयात थ्व द्वपनय् जमानत बियातःगु दु । राजपूतया अबु केके सिंहं चक्रवर्ति विरुद्ध एफआइआर दर्ता यायेधुंकाः वयात ज्वंगु खः ।

बुधवाः दर्ता याःगु चार्जसिटय् न्ह्यथनातःकथं चक्रवर्तिं थः किजा शौविक चक्रवर्ति, दीपेश सांवत, स्यामुएल मिरांडापाखें गाँजा कयाः राजपूतयात बीगु यानाच्वंगु खः । थ्व लागू वासःया निंतिं चक्रवर्तिं उमित ध्यबा नं पूगु खँ न्ह्यथनातःगु दु ।

मेखे लागू वासःया हे मामिलाय् बलिउड अभिनेता शाहरुख खानयात अदालतपाखें राहत चूलाःगु दु । मुम्बईया छगू विशेष अदालतं खानं अदालतं बुझे यानातःगु पासपोर्ट लित बीत धाःगु दु । खानयात एनसीबीं छगू क्रूज जहाज लागू वासः कयाच्वंगु धासें च्वंगु खः, तर लिपा वयात सफाइ बीधुंकूगु दु । खानयात थगुने ३ अक्टुबरय् मुम्बइ नं गोवा वनाच्वंगु क्रूज विमानय् छापा मारे यानाः ज्वंगु खः । उबलय् अदालतं जमानत मबिउनिबलय् तकया यानाः नीन्हु तक हिरासतय् च्वनेमाःगु खः । खानयात जमानत बिउबलय् बुझे यानातःगु पार्सपोर्ट आः लित बीत अदालतं आदेश बिउगु खः ।