विश्व कविता दिवसय् कविता पाठ

यल – विश्व कविता दिवसया लसताय् म्हीग थनया यलमाया केन्द्रय् थीथी भासं कविता वाचन यायेगु ज्या जुल । नेपाःस्थित ब्राजिल राजदूतावास व लिजः नेपालभाषा कविता दबूया ग्वसालय् उगु ज्याझ्वः जूगु खः । ज्याझ्वलय् नेपालभाषा लिसें थीथी भासं कविता पाठ जूगु खः । नेपाःया निंतिं ब्राजिलया राजदूत मारिया सेरेसा मस्कीता पेसोआं लसकुस यानाः न्ह्याकूगु उगु ज्याझ्वलय् नेपालभाषाया कविपिं पूर्ण वैद्य, डा. पुष्पराज राजकर्णिकार, प्रतिसरा साय्मि, श्रीराम श्रेष्ठ, भगतदास श्रेष्ठ, सुदन खुसः, शाक्य सुरेन, पुष्परत्न तुलाधर, नारद वज्राचार्य, रजनी मिला, सिल्भिया राजोपाध्याय, नवीन चित्रकारपिंसं नेपालभाषा व अंग्रेजी भाषां कविता पाठ यानादीगु खः । चित्रकारं नेपालभाषाया मदुपिं कविपिं बुद्ध साय्मि व श्यामसुन्दर साँय्जुया कविता नं पाठ यानादीगु खः ।

अथे हे ज्याझ्वलय् खस नेपाली भाय्या विमला तुम्खेवा, गीता कार्की, गुरुङ भाय्या छम गुरुङ, तामाङ भाय्या बीना थिङ तामाङ, लिम्बु भाय्या स्वप्निल स्मृति, चिनियाँ भाय्या युवेन शेन लिसें सिर्जना चौधरी व अभय कुमारपिंसं नं थःथःगु मांभाय् व अंग्रेजी भाय्या कविता पाठ यानादीगु खः । ज्याझ्वःया अन्त्यय् सुभाय् बिसें लिजःया नायः नवीन चित्रकारं अन ब्वंगु फुक्कं कविता मुनाः सफूया रुपय् पिकायेगु जानकारी बियादिल ।