सार्वजनिक जग्गाय् संरचना निर्माण याये मदइगु
येँ – येँ महानगर लागा दुनेया सार्वजनिक जग्गाय् छुं कथंया नं संरचना निर्माण याये मदइगु जूगु दु । महानगरपालिकां आपत विपद्या इलय् सर्वसाधारणं खुल्ला थाय्या प्रयोग याये दयेमा धइगु ल्याखं उकथंया सार्वजनिक थासय् संरचना निर्माण याये मदइकथंया योजना हःगु खः । येँ महानगरपालिकाया प्रमुख विद्यासुन्दर शाक्यं सहरी सुन्दरता, हरियालीया संरक्षण व उकियात ल्यंका तयेगु नापं आपत् विपद्या इलय् बासं च्वनेगु निंतिं खुल्ला थाय् सकसिनं छ्यले दयेमाः धासें उकिया संरक्षण यायेमाःगु खँ धयादीगु दु । प्रमुख शाक्यं येँ मनपा ३ वडाया वडा भवन लिक्कं च्वंगु साढे ६ आना जग्गा व उकी दयेकूगु छतँजाःगु भवनयात तकं निजी उपयोगपाखें सार्वजनिकीकरण यायेगु झ्वलय् उगु खँ धयादीगु खः ।
वय्कलं येँ महानगर दुनेया दक्वं खाली जग्गाय् सार्वजनिक भवन दयेके दइमखु धासें आवंनिसें सार्वजनिक जग्गाय् निर्माण जूगु भवन थुनाः सार्वजनिक जग्गा संरक्षया अभियान तकं न्ह्याकादीगु खः । उगु इलय् येँ मनपाया प्रमुख प्रशासकीय अधिकृत धनीराम शर्मां व्यवस्त सहरी जीवनया व्यवस्थापनय् सहजता हयेगु कुतः शुरु जूगु धासें अभियानयात सकारात्मक रुपं कायेत इनाप यानादिल । अथे हे वडाअध्यक्ष दीपक केसीं निजी उपयोगं लित कायेत सफल जूगु जग्गाया थौंकन्हय्या प्रचलित भाःकथं न्हय्गू करोड तका थ्यंगु धासें मेमेगु थासय् दुगु अज्याःगु जग्गायात नं सार्वजनिकीकरण याना यंकेगु जुइ धयादिल ।
LEAVE YOUR COMMENTS