महाकरुणामय अवलोकितेश्वरया महाभिषेक बीगु
येँ (नेपालभाषा टाइम्स)÷ थ्व हे वइगु असोज २७ गते शनिवाः महाकरुणामय अवलोकितेश्वरया महाभिषकेक जुइगु जूगु दु । ४१ औं साक्या गोङ्भा ठ्रिछेन् रिम्पाछें येँया चुच्चेपाटीइ च्वंगु तारागाउँ म्यूजियमया खुल्ला थासय् थ्व दुर्लभ महाभिषकेक बीत्यंगु खः ।
ग्वसाः खलः ब्योम कुसुमा बुद्धधर्म संघया कथं विश्वशान्ति, सद्भाव, भाइचारा व मानवताया निंतिं सकारात्मक ऊर्जा व सद्भाव प्रवाह यायेत थ्व महाभिषेक ज्याझ्वः जुइत्यंगु खः । थुगु ज्याझ्वलय् नेपाःया तराई, पहाड, हिमाल स्वंगुलिं भेगया सलंसः मनूतय्सं ब्वति काइगु खँ धाःगु दु ।
ज्याझ्वःया बारे जानकारी बीगु निंतिं सोमवाः जूगु छगू पत्रकार सम्मेलनय् न्ववासें बौद्ध गुरु नारायणप्रसाद रिजालं महायोगी श्रीधर राणा रिम्पाछेया इनापय् प्यंगुलिं बौद्ध सम्प्रदाययापाखें सम्मानित थीथी मण्डलया सिद्धि यानादीधुुंकूम्ह महामण्डलाधिपति गुरु ठ्रिछेन रिन्पोछें नेपाः वयाः अवलोकितेश्वरया महाभिषेक बीत्यंगु खँ कनादिल ।
स्वनिगः द्वलंद्वः दँ न्ह्यवनिसें करुणामय अवलोकितेश्वरया बास दुगु थाय् जूगुलिं थन अवलोकितेश्वरया महाभिषेक यायेगु तसकं सान्दर्भिक जुइगु तायेकाः गुरु ठ्रिछेनं थुगुसी अवलोकितेश्वरया हे महाभिषेक यायेत्यंगु खँ वय्कलं कनादिल । महाभिषेक बिइत्यंम्ह गुरु तिब्बतया साक्या परम्परा न्ह्याकावयाच्वंगु देव वंशया ४१ औं धर्मगुरु खः ।
LEAVE YOUR COMMENTS