हाकनं कोरोना संक्रमण जूम्हेसित गम्भीर समस्या

एजेन्सी – अमेरिकाय् निक्वःगुखुसी कोरोना संक्रमण खनेदुम्ह छम्ह मिजंयाके गम्भीर समस्या वःगु खँ चिकित्सकतय्सं धाःगु दु। २५ दँया ल्याय् म्हयात दोहरे जुयाः संक्रमण जूबलय् निगलं स्वँय् गाक्क अक्सिजन मथ्यंगुलिं अस्पताल भर्ना यायेमाःगु खः । तर आः धाःसा उम्ह मिजं कोरोना मुक्त जुइधुंकूगु दु ।

कोरोना संक्रमण हतपतं हाकनं जुइमखु धयागु विश्वास यानातःगु दु। तर ‘लासिन्ट इन्फेक्सस डिजिजेज’ नांया छगू जर्नल पिहांवःगु शोधय् थ्व भाइरस संक्रमण जुइधुंकाः गुलि प्रतिरोध क्षमता ब्वलनी धयागु विषयय् न्ह्यसः थनातःगु दु । अमेरिकाया दक्षिण पश्चिम राज्य नभाडाया उम्ह ल्याय्म्हयाके न्हापा स्वास्थ्य सम्बन्धी अज्याःगु छुं समस्या मदुगु खः । अथेहे कोभिडया जोखिम दइगु प्रतिरोध क्षमता सम्बन्धी मेमेगु अवस्था नं
मदुगु धाःगु दु।

वैज्ञानिकतय्सं उम्ह मनूयाके पुलांगु संक्रमण हे हाकनं लिथ्वया वःगु मखसे निक्वःखुसी नं न्हूगु हे संक्रमण जूगु खँ धाःगु दु। वयापाखें संकलन याःगु फरक फरक नमूनाया परीक्षण याःबलय् भाइरसया आनुवंशिक संरचनाय् हे भिन्नता खनेदुगु खः ।

‘जिमिसं पत्ता लगे यानाःगु खं पुलांगु संक्रमणं भविष्यय् जुइगु संक्रमणपाखें बचे यायेफइमखु धयागु संकेत क्यंगु दु’ युनिभर्सिटी अफ नभाडाया डा. मार्क प्यान्डरीं धयादीगु दु। वय्कलं छक्वः कोभिड १९ जुयाः लनेधुंकूम्ह मनुखं नं भौतिक दूरी, मास्क व ल्हाः सिलेगु थेंज्याःगु मापदण्ड पालना यायेमाःगु खँ धयादीगु दु ।

वैज्ञानिकत आः नं कोरोना भाइरस व प्रतिरोध क्षमता सम्बन्धी जटिल विषययात थुइकेगु कुतः यानाच्वंगु दु। आः फुक्कं संक्रमिततय् प्रतिरोध क्षमता दइ कि दइमखु, अले थज्याःगु सुरक्षा गुलि ताःहाकः तक कायम जुइ धयागु न्ह्यसः वैज्ञानिकतय् दथुइ ब्वलनाच्वंगु दु। कोरोना भाइरसपाखें झीत दीर्घकालतक गुकथं प्रभावित याइ व खोप व हर्ड इम्युनिटी (सामुहिक प्रतिरोध क्षमता) थेंज्याःगु विषयय् थुइकेत थ्व न्ह्यसः तसकं महत्वपूर्ण खः ।

आः पुलांगु संक्रमण हे लिथ्वया वःगु यक्व खनेदुगु दु, तर आःतक संक्रमित जूपिं ३.७ करोड संक्रमितत मध्ये तसकं म्होयात जक हाकनं न्हूगु हे संक्रमण जूगु खनेदुगु दु ।