बजेट उखेथुखे याःम्ह सु ?

येँ – प्रमुख प्रतिपक्षी नेकपा एमालें कर, भन्सार व राजश्व दर गुकथं हिल धइगु खँय् अर्थमन्त्री जनार्दन शर्मां संसदय् लिसः बीत माग याःगु दु । प्रतिनिधिसभाया म्हिगःया बैठकय् न्ववासें एमाले सांसद योगेश भट्टराईं सञ्चारमाध्यमय् वःगु विषयय् अर्थमन्त्रीं लिसः बीत माग यानादीगु खः ।

सांसद भट्टराईं धयादिल, ‘सांसदतय्सं विद्युतीय सवारी साधनय् छाय् अन्तःशुल्क कयागु, छाय् भन्सार महसुल अप्वयेकूगु धासें न्ह्यसः थनाच्वंगु दु, स्वास्थ्य बिमा छाय् प्राइभेट कम्पनीयात बीत्यंगु, लाकां व स्यानिटरी प्याडय् छाय् कर कयागु धकाः न्ह्यसः थनाच्वंगु दु, तर सरकारं उकिया लिसः बियाच्वंगु मदु ।’

छुं न्हिं न्ह्यः जक बजेट दयेकेगु लिपांगु न्हि कुन्हु छम्ह सुब्बा तहया कर्मचारीं करया दर उखेथुखे याःगु खँ सञ्चार माध्यमय् पिहां वःगुखः । उकी हे न्ह्यसः तसें सांसद भट्टराईं धयादिल, ‘सुं अमुक मनूयात अर्थ मन्त्रालयय् सmतल, कार्यकक्षय् दुपिं अर्थ मन्त्रालयया सचिव, राजश्वया सचिव, बजेट शाखा प्रमुखपिंत उम्ह मनूया धापू हे थःगु धकाः धयादिल, चान्हय् मेम्ह हे मनूया माध्यमं कर, भन्सार व राजश्वया दरयात उखेथुखे यानाः छु यायेत स्वःगु खः ?’

भट्टराईं सञ्चार माध्यमय् वःगु विषययात कयाः गोपनियता भंग जूगु धासें थ्व राष्ट्रघात खः धकाः नं द्वपं बियादिल ।
थ्वहे झ्वलय् म्हिगः अर्थ मन्त्रालयं छगू विज्ञप्ति पिकासें बजेट दयेकेगु झ्वलय् मन्त्रालयया सम्बन्धित कर्मचारी बाहेक मेपिं सुं नं गैर व्यक्तियात संलग्न मयाकूगु खँ स्पष्ट याःगु दु ।

अर्थमन्त्रीया राजीनामा फ्वन ?
माओवादी केन्द्रया अध्यक्ष पुष्पकमल दाहालं थम्हं अर्थमन्त्री जनार्दन शर्माया राजीनामा फ्वन धकाः पिहां वःगु खँ फय्गं जक खः धयादीगु दु । लिसें वय्कलं थौंकन्हय् सुं नं मन्त्रीयात लितसःतेगु पार्टीया नीति मदुगु खँ नं स्पष्ट यानादीगु दु । छुं अनलाइन सञ्चार माध्यमं अध्यक्ष दाहालं अर्थमन्त्री शर्मायात वंगु आइतवाः थःगु छेँ खुमलटारय् सःताः राजीनामा माग याःगु समाचार सार्वजनिक याःगु खः । अध्यक्ष दाहालं अर्थमन्त्रीया राजीनामा लिसे स्वानाः वःगु गुगुं नं समाचार बदनाम यायेत स्वःगु अफवाह व षडयन्त्र बाहके छुं मखु धासें शर्मालिसे आइतवाः नापलायेगु झ्वलय् पार्टी संगठनया बारे खल्हाबल्हा जूगु खँ नं स्पष्ट यानादीगु दु ।
थ्व स्वयां न्ह्यः थीथी सञ्चार माध्यमय् अर्थमन्त्री शर्मायात लित सःतेगु बारे पार्टी दुने सहलह न्ह्याःगु समाचार सार्वजनिक जूगु खः ।

सम्बन्धित बुखँ

LEAVE YOUR COMMENTS