ने. सं. ११४६ बछलागा तृतीया -

गौशाला धर्मशाला विवादय् मन्त्रीं बैठक सतल

येँ (रासस)- संस्कृति, पर्यटन व नागरिक उड्डयन मन्त्री बद्रीप्रसाद पाण्डे गौशाला धर्मशाला विवाद न्हंकेगु कुतः कथं पशुपति विकास कोषया बैठक आह्वान यानादीगु दु । नापं वय्कलं धर्मशालाया सम्बन्धय् छु कथंया नं ज्याः मन्ह्याःकेत नं उजं बियादीगु दु । कोषया नायः नापं जुयादीम्ह मन्त्री पाण्डें असोज ३० गते कोषया नामय् छपू पौ च्वयाः ‘शान्ति सुरक्षाय् समस्या ब्वलंगु’ न्ह्यःथसे गौशाला धर्मशाला खाली यायेगु ज्या दिकेत उजं बिउगु खः । मन्त्री पाण्डें वइगु कात्तिक ४ गते परिषद् बैठक मन्त्रालयय् यायेत आह्वान नं यानादीगु कोषया प्रवक्ता रेवतीरमण अधिकारीं राससयात कनादिल ।

कोषं थःगु स्वामित्वय् दूगु राज्यया सम्पत्ति धर्मशालायात सुुं छम्ह व्यक्ति वा व्यापारिक पुचःपाखें चले याके बिइगुया पलेसा गैरनाफामुखीढंग येँ महानगरपालिकानाप जाना चले याना वनेगु घोषणा यायेवं विवाद ब्वलंगु खः । थ्व घोषणाप्रति मारवाडी सेवा समितिपाखें असहमति प्वंकावयाच्वंगु दु ।