इम्बोस्ड नम्बरया विरोध

येँ – नेपाली कांग्रेसया महामन्त्री गगन थापां इम्बोस्ड प्लेट जडानय् जबरजस्ती मयायेत माग यानादीगु दु । पूर्वाधार तयार मयासे नागरिकयात धम्कीया भासं जारी याःगु सुचं खारेज यायेमाःगु नं वय्कलं माग यानादीगु दु ।

म्हिगः संसदय् विशेष ई कयाः न्ववासं महामन्त्री थापां इम्बोस्ड नम्बर प्लेट बारेया व्यवस्था भिंकेमाःथाय् सरकारं अःपुगु तर गलत लँपु ज्वंगु टिप्पणी यानादीगु दु । बागमती व गण्डकी प्रदेशय् साउन १ गतेनिसें इम्बोस्ड नम्बर मतल धाःसा कारबाही जुइगु ख्याच्वः यातायात व्यवस्था विभागं बिउगु दु ।

वय्कलं धयादिल, ‘आः झिंन्यान्हुया दुने २५ लाख सवारी इम्बोस्ड नम्बर तयेगु धकाः धाःगु दु, न्हिं ५ हजार इम्बोस्ड नम्बर बीगु धकाः धाःगु दु, गुकथं सम्भव दु, निगू स्वंगू ज्याकुथीपाखें बी फइगु खँ खः ला ?’