विशालनगरय् नेपालभाषा साहित्य तःमुँज्या

येँ (नेपालभाषा टाइम्स)÷ नेपालभाषा साहित्य तःमुँज्या येँया ग्वसालय् स्वक्वःगु नेपालभाषा साहित्य तःमुँज्या विशालनगर हाडीगांया भिंद्यःयाथाय् जुल । ज्याझ्वः स्थानीय देय् थकाली देवदास डंगोलं त्वाःदेवाय् मत च्याकाः उलेज्या यानादीगु खः । ज्याझ्वलय् प्रदेश सांसद सुरेन्द्रराज गोसाईनं देय् थकाली देवदास डंगोलयात दोसल्ला न्ययेकाः हनापौ देछासें हनेज्या याःगु खः । ज्याझ्वःया मूपाहां संघीय सांसद प्रेम सुवालं साहित्य वाचनय् न्हाप, लिउ व लियां लिउ लाःपिं साहित्यकारतय्त सिरपाः व दसिपौ लःल्हानादीगु । ज्याझ्वलय् ओमनरहरि श्रेष्ठ न्हाप, कमलबहादुर डंगोल लिउ, रमेशमान महर्जन लियां लिउ व पूर्णिमा मगरयात हःपाः सिरपाः लाःगु खः ।

टंगाल माविया अनिता बस्यल व अनिता आलेमगरया नेपालभाषाया चिनाखं सुरु जूगु ज्याझ्वलय् लोककवि राजभाई जकःमिं कविताय् विचार पक्ष नापं कला पक्ष नं बांलायेमाः धयादिसें न्हूपिं च्वमिपिंत हौसला बीकथंया मचा चिनाखँ न्यंकादीगु खः । हाडीगांया बारे विज्ञ इतिहासकार डा. सुदर्शनराज तिवारीं भाषा, कला, साहित्य, वास्तुकला, धर्म संस्कृतिया केन्द्रय् हे च्वना थज्याःगु ज्याझ्वः जूगु तसकं बांलाः धयादिसें लिच्छविकाल तक नं राजधानी जुयाच्वंगु हाडीगां विशालनगर मल्लकाल लिपा तहसनहस जूवंसां थनया ऐतिहासिक विषयवस्तु आः नं ज्वःमदुगु दनि धयादिल ।

नेपालभाषा साहित्य तःमुँज्याया नायः रत्ना शेर्पा डंगोलया सभापतित्वय् जूगु ज्याझ्वलय् बागमती प्रदेशया सांसद राजेन्द्र प्रजापति, भेटेनरी डाक्टर अन्जिरमान सिं, साहित्यकार रोचक घिमिरे, प्रा. धर्मराज डंगोल, चन्द्रबहादुर श्रेष्ठ, महन्त महर्जन लगायतया साहित्यकार, लेखक व च्वमिपिंसं थःथःगु न्वचु व रचना न्ह्यब्वयादीगु खः ।