मस्र्याङ्दीइ भारतीय बस कुतुं वनाः नीन्हय्म्ह सित

येँ (नेपालभाषा टाइम्स)÷ तनहुँ, आँबुखैरानीया ऐनपहरा धाइगु थासय् छगः बस मस्र्याङ्दी खुसिइ कुतुं वंगु दु । थ्व दुर्घटनाय् लानाः बसय् च्वनावःपिं नीन्हय्म्ह यात्रु सीगु दुसा मेपिं घाःपाः जूपिं झिंखुम्ह दु । तनहुँया प्रमुख जिल्ला अधिकारी जनार्दन गौतमया कथं बसय् चालक व सहचालक यानाः ४३ म्ह दुगु खः । थुपिं मध्ये नीन्हय्म्ह सीगु खःसा झिंखुम्हेसित सेनाया हेलिकप्टरं उपचारया निंतिं येँय्
छ्वयाहःगु दु ।

दुर्घटनाय् लाःगु बस भारतीय बस खः । गोरखपुरं वंगु बुधवाः पोखराय् थ्यंगु युपी ५३ एफटी ७६२३ नं.या थुगु बस थौं पोखरां येँ पाखे वयाच्वंगु इलय् दुर्घटना जूगु खः । गौतमया कथं ९० म्ह भारतीय पर्यटकत निगः बसं
नेपाः वःगु खः । उकिं मध्ये छगः बस सतकं ३०० मिटर क्वय् कुतुं वंगु वनाः खुसि सिथय् फातापूवंगु खः ।

छु कारणं बस दुर्घटना जुल धयागु सीमदुनि । आँबुखैरनी गाउँपालिकाया अध्यक्ष शुक्र चुमानया कथं बस दुर्घटना जूगु थाय् अपाय्सकं दुर्घटना जुइगु कथं मछिंगु थाय् मखु । बस तीव्रगतिइ दुगुलिं दुर्घटना जूगु अनुमान वय्कःया दु । ‘तीव्रगतिं वःगु बस मोडय् चाःहिकूबलय् दुर्घटना जूगु जुइफु’ वय्कलं धयादीगु दु । बस सतक सिथय् तयातःगु ब्यारियर हे त्वाःथला खुसिइ कुतुंवंगु खः ।

बस कुतुवंगु थाय् तसकं ज्यामछिंगु थाय् जूगुलिं उद्धार यायेत नं थाकूगु खँ आँबुखैरानी इलाका प्रहरी कार्यालयया प्रमुख शिव थापां धाःगु दु । उद्धारय् सेना, सशस्त्र प्रहरी, प्रहरी लिसें स्थानीयत खटे जूगु खः ।