मन्त्रीत हिलेगु प्रस्ताव अस्वीकार

येँ – नेकपा (एसं) सरकारय् वनाच्वंपिं थःगु पार्टीया वर्तमान मन्त्रीतय्त लित सःताः न्हूपिंत छ्वयेगु धकाः हःगु प्रस्तावयात प्रधानमन्त्री शेरबहादुर देउवां अस्वीकार यानादीगु दु । नेकपा (एस) या थ्व प्रस्तावबारे विवाद पिहां वयेवं प्रमं उकियात अस्वीकार यानादीगु खः ।

बजेटबारे सहलह न्ह्यानाच्वंगु इलय् सम्बन्धित मन्त्री हिलेगु उचित मजू धासें नेकपा एसया मन्त्रीतय्सं प्रम देउवायात इनाप याःगु खः । उकथं हे उमिसं माओवादी अध्यक्ष पुष्पकमल दाहालयात नं नापलानाः अध्यक्ष माधव नेपालयात सम्झे यायेत इनाप याःगु खः।
म्हिगः सुथय् थ्व बारे सहलह यायेत च्वंगु शीर्ष नेतातय्गु बैठकय् ‘एस’ या मन्त्रीत हिलेबलय् मेगु दलय् नं मन्त्री हिलेगु दबाब वइगु व उकिं यानाः सत्ता गठबन्धनयात निरन्तरता बीत हे समस्या पिहां वइगु विश्लेषण जूगु खः ।

बालुवाटार सूत्रया कथं म्हीग सुथय् प्रम देउवा व माधव नेपाल दथुइ मन्त्री हिलेगु बारे सहलह जूगु इलय् देउवां सकारात्मक संकेत बियादीगु खः । वयां लिपा नेपालं पार्टीया सचिवालय बैठक सःताः बहालवाला मन्त्रीत लित सःताः न्हूपिंत छ्वयेगु निर्णय याःगु खः । उकिया नितिं प्यम्हेसिया नां व मन्त्रालय तकं क्वःछिनाः प्रधानमन्त्रीयात छ्वःगु खः । तर पार्टीया निर्णययात एसया मन्त्रीतय्सं आपत्ति प्वंकुसें प्रधानमन्त्रीयात निर्णय कार्यान्वयन मयायेत दबाब बिउगु खःसा वयां लिपा प्रम देउवां सत्ता गठबन्धनया बैठक सःताः गठबन्धन व बजेटय् हे लिच्वः लायेफइगु जूगुलिं तत्काल मन्त्री महिलेगु निर्णय यानादीगु खः ।

नेकपा एसं पर्यटन मन्त्री प्रेमबहादुर आले, स्वास्थ्य मन्त्री विरोध खतिवडा, सहरी विकास मन्त्री रामकुमारी झाँक्री व कृष्णकुमार श्रेष्ठयात लित सःताः न्हूपिं मन्त्री कथं जीवनराम श्रेष्ठ, मेटमणि चौधरी, शेरबहादुर कुँवरयात मन्त्री दयेकेगु सिफारिस याःगु खः ।

प्रम देउवाया निर्णय लिपा म्हिगः हे नेकपा (एस) या अध्यक्ष माधव नेपालं थः मन्त्रीतय्त अन्यथा मकासे ज्या निरन्तर यानाच्वनेगु इनाप यानादीगु दु । प्रम देउवां म्हिगः हे मन्त्रिपरिषद्या बैठक सःताः लित सःतूपिं मन्त्रीतय्त समेत दुथ्याकाः सहलह यानादीगु दु ।

सिफारिस जूपिं सांसदत हिस्स
नेकपा (एस) पाखें न्हूपिं मन्त्री धकाः सिफारिस याःपिं सांसदत अन्तिमय् वनाः हिस्स जूगु दु । गुलिखे प्रस्तावित नेतातय्त म्हिगः हे सामाजिक सञ्जालय् यक्वस्यां बधाई समेत बियाहःगु खः ।

थ्वहे झ्वलय् नेकपा (एस) या वरिष्ठ नेता झलनाथ खनालं मन्त्री हिलेगु निर्णय पार्टीया सार्वभौम अधिकार खः धासें उकियात सुं पिनेयापिंसं पने मफइगु खँ धयादीगु दु । थःपिंसं वहे अधिकार प्रयोग यानाः मन्त्रीत हिलेगु धकाः निर्णय यानागु दावी नं वय्कलं यानादीगु दु । एसपाखें मन्त्री हिलेगु प्रस्ताव वयेवं माओवादी केन्द्र व कांग्रेस दुने समेत मन्त्री हिलेमाःगु खँ पिहां वःगु खः ।

सम्बन्धित बुखँ

LEAVE YOUR COMMENTS