ने. सं. ११४४ ञलाथ्व पुन्हि - येँया: पुन्हि

चक्रपथ हस्तान्तरणया तयारी

येँ – दयेके क्वचाःगु चक्रपथ कोटेश्वर कलंकी खण्ड चीनं सोमवाः नेपाःयात हस्तान्तरण याइगु जूगु दु । न्यादँ बिकाः विस्तार याःगु चक्रपथया छगू खण्ड हस्तान्तरण यायेगु तयारी यानाच्वंगु खः । आयोजना हस्तान्तरण ज्याझ्वलय् प्रधानमन्त्री केपी शर्मा ओलीया उपस्थितिइ जुइगु खँ धाःगु दु ।

सतक विस्तारया ज्या क्वचायेवं उगु सतक खण्ड आधुनिक खनेदुसां नं वैज्ञानिक कथं डिजाइन मजूगुलिं यानाः उकियात कयाः आलोचना नं जुयाच्वंगु दु । सरकारं उगु सतक खण्डय् सर्भिस लेन दयेकेगु ज्या धाःसा ल्यं दनि । आः दयेकेगु क्वचाःगु १० दशमलव ३९ किलोमिटर हस्तान्तरण लिपा मेगु खण्ड नं चीन सरकारया हे ग्वाहालिं दयेकेगु खँ धाःगु दु ।

चक्रपथ मुक्क २७ किलोमिटर दु । आयोजनां कोटेश्वर, बागडोल व ग्वार्कोय् आकाशे ताँ दयेकूगु दुसा आः सरकारं नं छुं छुं अत्यावश्यक थासय् आकाशे तां दयेकेगु ज्या न्ह्याकाच्वंगु दु । वंगु २०७३ सालय् क्वचायेमाःगु आयोजना भुखाय् व नाकाबन्दीया कारणं लिबाःगु खः । आयोजना सफलताया मू ज्या धइगु कलंकी दयेकूगु अण्डर पास जूगु खँ धाःगु दु ।

गुकिं कलंकी लागाय् जुइगु जामयात म्हो याइगु विश्वास यानातःगु दु । अथेहे चक्रपथया ल्यं दनिगु थासय् नं चीनया कम्पनीं हे याकनं ज्या न्ह्याकीगु खँ धाःगु दु । चक्रपथ विस्तार यायेगु ल्यं दनिगु थासय् अण्डरपास दयेकेगु बारे सहलह जुयाच्वंगु खँ सीदुगु दु । विशेष यानाः महाराजगञ्ज व चाबही लागाय् अन्डरपास दयेकेगु बारे तयारी जुयाच्वंगु दु ।