सुरुङ बन्द जुइवं मेलम्चीया लः नं बन्द

येँ-मेलम्ची आयोजना अन्तर्गत लाःगु सुरुङया सिन्धुपाल्चोकय् च्वंगु अम्बाथानस्थित मू ध्वाखा बन्द याःगु दु । मू ध्वाखा बन्द जुइवं आः स्वनिगलय् वइगु मेलम्चीया लः नं बन्द जूगु दु ।

प्रि–मनसुन सक्रिय जुइवं मेलम्ची खानेपानी विकास समितिं सुरुङया ध्वाखा बन्द याःगु खः । खुसिबाः वयेफइगु कथं मनसुन सक्रिय जुइगु अवस्था वयेवं आयोजनां लः हयेगु दिकेगु समिति तयारी यानाच्वंगु खः । म्हिगः सुरुङया मू ध्वाखा बन्द यानाः अन दुपिं प्राविधिकत लिहां वंगु दु ।

थ्वहे वंगु वैशाख ११ गतेनिसें सरकारं अस्थायी संरचना दयेकाः येँय् मेलम्चीया लः इनेगु शुरु याःगु खः । अस्थायी बाँधं तप्यंक सुरुङय् लः छ्वयातःगु खःसा वा वइगु इलय् सुरुङय् वये फइगु जोखिमयात ध्यानय् तयाः सुरुङ बन्द याःगु खः ।

समितिया कथं आः वइगु असोज मसान्त तक सुरुङ बन्द जुइसा उगु इलय् मौसम गज्याःगु जुइ उकियात स्वयाः जक हाकनं सुरुङ चायेकाः लः छ्वया हयेगु वा महयेगु निर्णय जुइगु खँ समितिं धाःगु दु । समितिया कथं नियमित वा वयेगु दीवं सुरुङय् लः छ्वयेगु ज्या हाकनं न्ह्याइ ।
वंगु दँया असार १ गते वःगु खुसिबालं आयोजनाय् क्षति जूगु खःसा आयोजनाया मुहान सफा यानाः मेलम्चीया लः तप्यंक हे सुरुङय् तःगु खः । यदि आः हाकनं तःधंगु खुसिबाः वल धाःसा सुरुङ हे खतराय् लाइगु सम्भावना दुगुलिं सुरुङय् लः छ्वयेगु ज्या दिकेमाःगु खँ समितिं धाःगु दु ।

सम्बन्धित बुखँ

LEAVE YOUR COMMENTS