२ नम्बरय् पालंपाः सरकार ?

येँ – न्हय्गू प्रदेश मध्ये मधेसवादी दलतय्गु बाहुल्यता दुगु प्रदेश नं. २ लय् संघीय समाजवादी फोरम व राजपां पालंपाः मुख्यमन्त्री नयेगु प्रस्ताव न्ह्यःने हःगु दु । अथे खःसां मुख्यमन्त्रीया प्रमुख दावेदार कथं धाःसा संसफो हे न्ह्यःने दुसा संसफों थ्व पालंपाः मुख्यमन्त्री नयेगु प्रस्तावयात स्वीकार यानाच्वंगु मदुनि । संसफों आः नकतिनि थःपिनि संसदीय दलया नेता पदय् लालबाबु राउतयात मनोनयन याःगु दु । संसफो विशेष यानाः यादव जातिया पकड दुगु पार्टी खःसां थ्वं दलया नेता पदय् धाःसा वीरगंजया मुस्मां जातियाम्ह लालबाबुयात निर्वाचित याःगु दु ।

थौंकन्हय् पार्टीया उपााध्यक्ष समेत जुयादीम्ह वय्कः सुरुंनिसें पार्टी अध्यक्ष उपेन्द्र यादवया सतिक ज्वनाः ज्या याना वयाच्वंम्ह खः । दलया नेता समेत जूगु कारणं लालबाबु राउत हे आः २ नम्बर प्रदेशया मुख्यमन्त्री जुइगु निश्चित दुसां राजपाया समर्थन मकायेवं वय्कलं सरकार दयेके धाःसा फइ मखु । उखे संसफो स्वयां छुं भचा जक कम सीट दुगु पार्टी राजपां पालंपाः सरकार चले यायेगु प्रस्ताव हःगु दु । यदि थ्व प्रस्ताव माने मयात धाःसा लिपा वाम गठबन्धनलिसे जानाः राजपां सरकार दयेकः वनीगु सम्भावना वयेफुगु खँ धया हःगु दु ।