कलंकी, कुलेश्वर, सितापाइला जलमग्न, विष्णुमति व बल्खु खुसिं मनू चुइकल

मदिक्क वयाच्वंगु वां यानाः स्वनिगःया थाय्थासय्या बस्ती डुबानय् लाःगु दु । येँया कलंकी, सितापाइला, कुलेश्वर, सतुंगल, बालकुमारी, थानकोट लागाय् बांमलाक लः दुहां वःगु दु, अथेहे ख्वपय् नं जगाती, हनुमानघाट, चुपिनघाट, सल्लाघारी, राधेराधे, बालकोट, सागबारी लगायतया थासय् लः दुहां वःगु दु ।

बस्ती छगू छगू तल्ला डुबे जुइक लः दुहां वयेवं सशस्त्र प्रहरी, सेना डुंगा ज्वनाः हे उद्धारय् खटे जुयाच्वंगु दु । कुलेश्वरया ओरेन्टल कोलोनी, कलंकी मालपोत ज्याकू दुगु लागाय् लः दुहां वयेवं सशस्त्र प्रहरीं लखय् फँसे जूपिंत डुंगाय् तयाः उद्धार याःगु दु । थन बल्खु खुसिया लः व दुहां वःगु खः । अथेहे सतुंगः, थानकोटपाखे विष्णुदेवी खुसिया सिथसिथय् डुबानय् लाःगु दु ।

विष्णुमति व बल्खु खुसिइ तिंन्हुपिं तन
मेखे शुक्रवाः सुथय् परोपकार ताँ क्वय् विष्णुमतिइ खुसिइ कुहांवंम्ह छम्हेसित खुसिं चुइका यंकूगु दुसा बल्खु खुसिइ नं खुसिं चुइकाहःगु ग्यास सिलिन्डर लायेत वंम्ह छम्हेसित चुइकायंकूगु दु । परोपकार ताँय् क्वय् छम्ह मधेसी मूलयाम्ह मनू खुसि सिथय् लँ त्वःताः, मोबाइल क्वय् तयाः खुसिइ तिंन्हुबलय् वयात चुइकायंकूगु खँ प्रत्यक्षदर्शीतय्सं धाःगु दु । मनूतय्सं स्वस्वखंकं हे वयात चुइकः यंकूगु खःसा वयागु अवस्था सिइकेमफुनि । मेखे बल्खु खुसिइ चुइकाहःगु ग्यास सिलिन्डर लायेत वंम्ह बर्दियाया विनोद चौधरीयात चुइकायंकूगु खँ प्रहरीं धाःगु दु । बिहिवाः चान्हय् छगू ग्यास डिपों चुइकाहःगु ग्यास सिलिन्डर लायेत व खुसिइ कुहां वंगु खँ धाःगु दु ।