सतक विस्तार पं वंपिं ज्वन

सर्वोच्चया अपमान यासें निजी जग्गा क्वत्यलेगु कुतः

येँ – सतक विस्तार पीडित संघर्ष समितिया नायः सुमन साय्मि सहित स्वम्हेसित म्हिगः प्रहरीं ज्वना यंकूगु दु । येँया ४ वडाया धुम्बाराहीइ वडां स्थानीय जनता जग्गाय् धः व लँ दयेकेत्यंगु खःसा उकिया विरोधय् स्थानीय जनताया लगायत सतक विस्तार पीडित संघर्ष समितिं विरोध यायेवं ज्वंगु खः ।

स्थानीय वासिन्दा राम लामा व श्याम पियाया जग्गाय् वडां धः तयेगु लिसें सतक विस्तार यायेगु कुतः याःगु खः । उकिया विरोध यायेवं वडाध्यक्ष मोहनबहादुर बिष्टं जबर्जस्ती धः दयेकेगु ज्या याःगु द्वपं स्थानीय बासिन्दां बिउगु दु । स्थानीय बासिन्दां विरोध यायेवं वडाध्यक्ष बिष्टं प्रहरी सःताः विरोध याःपिंत ज्वंका छ्वःगु खः ।

प्रहरीं अध्यक्ष साय्मि, रामलाल लामा व सुरेन्द्र श्रेष्ठयात ज्वना यंकूगु खः । ज्वना यंकूपिंत महाराजगञ्ज प्रहरी कार्यालयय् तयातःगु दु ।
ज्वना यंकूपिंत त्वःतकेगु बारे म्हिगः संघर्ष समितिया पदाधिकारी व प्रहरी दथुइ सहलह जूगु खःसां वार्ता सफल जुइ मफुत । प्रहरीं ज्वना यंकूपिंत सार्वजनिक मुद्दा तयेगु कुतः यानाच्वंगु खःसा संघर्ष समितिं धाःसा सार्वजनिक मुद्दा तयेगु खःसा वडाध्यक्ष बिष्टयात नं मुद्दा तयेमाःगु अडान कयाच्वंगु दु ।

संघर्ष समितिया पदाधिकारीपिंसं प्रहरी लिसे वार्ता यायेगु झ्वलय् सर्वोच्च अदालतं मुआब्जा मबीकं स्थानीय जनताया जग्गा अधिग्रहण याये मदइगु आदेश बियातये धुंकूगुलिं यदि अन जबर्जस्ती सतक विस्तार यायेगु खःसा थ्व सर्वोच्च अदालतया अवहेलना जुइगु व उकिया मतियार प्रहरी प्रशासन समेत जुइ धासें ज्वनातःपिंत त्वःतेमाःगु माग याःगु खः ।

वार्ताया झ्वलय् थःपिंसं वडायात उपत्यका विकास प्राधिकरण व भौतिक तथा पूर्वाधार विकास मन्त्रालयं जग्गा अधिग्रहण यानागु पौ च्वयेमाः धकाः माग यानागु व उगु मागय् धाःसा वडाध्यक्ष माने मजूगु जानकारी नं संघर्ष समितिया दुजः जितेन्द्र बज्राचार्यं ‘नेपालभाषा टाइम्स’ यात बियादिल ।

ज्वना तःपिं सकसितं म्हिगः हे बहनी ७.३० बजे त्वःता हःगु खँ सीदुगु दु । शुरुइ वय्कःपिंत मत्वःतेगु खँ जूगु खःसां प्रहरीं लिपा त्वःता हःगु खः । थ्वहे झ्वलय् वडा नम्बर ४ या वडा अध्यक्ष बिष्ट थः हे नं सार्वजनिक जग्गा अतिक्रमण यानाः छेँ दनाः च्वनाच्वंगु खँ नं सार्वजनिक जूगु दु ।

उकिया विरुद्ध नं आः संघर्ष समितिं आन्दोलन यायेगु तयारी यानाच्वंगु दु । स्थानीय जनताया निजी जग्गाय् सतक विस्तार यायेगु तर थः धाःसा सरकारी जग्गा अतिक्रमण यानाः छेँ दयेकेगु वडाध्यक्षया चरित्र विरुद्ध भण्डाफोर यायेगु कथं ज्याझ्वः वये फइगु खँ संघर्ष समितिं धाःगु दु ।

सम्बन्धित बुखँ

LEAVE YOUR COMMENTS