येँयाः नखः व्यवस्थित रुपं न्यायेकेत सहलह ज्याझ्वः

येँ – न्ह्यःने वयाच्वंगु येँयाः नखः व्यवस्थित यायेगु निंतिं वंगु शुक्रवाः थनया खुसिबुँस्थित नेपाः बैंक्वेटय् इन्द्रजात्रा व्यवस्थापन समिति व येँ महानगरपालिका हनुमानध्वाखा दरवार क्षेत्र संरक्षण कार्यक्रमया मंकाः ग्वसालय् छगू सहलह ज्याझ्वः जुल ।

येँ महानगरपालिकाया मेयर विद्यासुन्दर शाक्य मूपाहां कथं झाःगु उगु ज्याझ्वलय् येँयाः जात्रा लिसे सम्बन्धि थीथी २९ गू गुथि गहना खलः, थीथी स्थानीय क्लबपिं नापं प्रतिनिधि सभाया सांसद कृष्णगोपाल श्रेष्ठ व प्रदेश सभाया सांसदपिं डा. अजयक्रान्ति शाक्य, राजेश शाक्य, बसन्त मानन्धर उपमेयर हरिप्रभा खड्गी श्रेष्ठ लिसें थीथी वडाया वडाध्यक्षपिं पाहां कथं झाःगु खः ।

व्यवस्थापन समितिया नायः गौतमरत्न शाक्यया सभापतित्वय् न्ह्याःगु उगु ज्याझ्वलय् येँयाः जात्रा संचालन यायेगु निंतिं येँमपां ७ लख तका बियातःगु खःसा थुगुसीनिसें १० लख तका बीगु निर्णय याःगु दुसा २९ गू गुथि खलःपिंत सहजरुपं जात्रा संचालन यायेगु निंतिं राज्यं एक द्वार प्रणालीं अक्षय कोष स्थापना यायेमाल धइगु व्यवस्थापन समितिं न्हापांनिसें याना वयाच्वंगु मागया सवालय् जनप्रतिनिधिपिंसं थुगु जात्रा निसें पहल यायेगु बचं बियादीगु खः ।

ज्याझ्वलय् व्यवस्थापन समितिया वरिष्ठ उपाध्यक्ष शरदकुमार डंगोलं व्यवस्थापन समितिया परिचय बियादीगु खःसा महासचिव बाबुराजा महर्जनं ज्याझ्वः संचालन यानादीगु खः ।