सुरजवीरया ‘हाकुमैंचा’ पिहां वल

थिमि- नेपालभाषाया नांजाःम्ह म्येँ हालामिलिसें संचारकःमि सुरजवीर वज्राचार्यया न्हूगु म्येँ ‘हाकुमैंचा तुइसे च्वंकाः …..’ या म्युजिक भिडियो पिदंगु दु । उगु म्येँ सुरजवीरं हे च्वयाः हालादीगु खः ।

मध्यपुर थिमि नगरपालिकाया प्रमुख मदनसुन्दर श्रेष्ठं थनया प्यासिफिक फुडल्याण्डय् जूगु छगू ज्याझ्वःया दथुइ उगु म्येँया म्युजिक भिडियोया पितब्वज्या यानादीगु खः । म्युजिक भिडियो पितब्वज्या यासें नगरप्रमुख श्रेष्ठं नेपालभाषाया म्येँ व्यावसायीकरण याना यंकेमाःगु खँय् बः बियादिल ।

गुगुं नं जाति, वर्ग, समुदाययात भावनायात सांगीतिक माध्यमं पिथनाः उकियात अन्तर्राष्ट्रियकरण याना यंके फइगु विचाः तयादिसें वय्कलं म्युजिक भिडियोयामाध्यमं ऐतिहासिक, धार्मिक, सांस्कृतिक महत्वं जाःगु सम्पदाया प्रचार प्रसार यानाः नं योगदान याये फइगु खँ कनादिसें नेपालभाषाया म्येँया निंतिं थम्हं नं ग्वाहालि यायेगु प्रतिवद्धता प्वंकादिल ।

म्येँ च्वमिलिसें हालामि वज्राचार्यं म्येँया भावया विषययात कयाः थःगु नुगःखँ तयादीगु खः । वय्कलं इहिपाया लँ स्वःवनेबय् नेवाः म्येँ हालोगु चलनकथं थुगु म्येँया सिर्जना यानागु खँ कनादिल ।

ज्याझ्वलय् ख्वप नगरपालिकाया पुलांम्ह उपप्रमुख नापं संस्कृतिविद् ओमचरण अमात्यं कला, संस्कृति, सम्पदा व संगीतयात विकास यानायंकेमाःगु खँय् बः बियादीगु खः ।
नेपाल सांस्कृतिक उत्थान परिषदं पिथंगु म्युजिक भिडियोया निर्देशन बालमुकुन्द प्रजापतिं यानादीगु खःसा छाँयाकनं व सम्पादन देवेन्द्र प्रजापतिं यानादीगु खः । म्युजिक भिडियोय् अनु खड्का, रमेश बल्ल, आशाराम शिल्पकारया मुख्य भूमिका दुसा मेपिं कलाकारय् डेरिका छन्त्याल, आरति भासिमा, अस्मिता मानन्धर, लिजा प्रजापति व निशा प्रजापतिं नं अभिनय यानादीगु दु ।

दीपक वज्राचार्य व सागर बनमालां कोरियोग्राफी यानादीगु म्युजिक भिडियोया म्येँय् जुगल डंगोलं लसय् हनादीगु खः ।