ने. सं. ११४४ कौलाथ्व पारू - नःलास्वनेगु

२३ वडाय् मतदातातय्त सुभाय् देछा

येँ(नेपालभाषा टाइम्स)- नेपाल कम्युनिष्ट पार्टी (एमाले) २३ वडा कमिटीं मतदातातय्त सुभाय् देछाःगु दु । वंगु शनिवाः जूगु ज्याझ्वलय् पार्टीया उम्मेदवारपिंत मत बियाः निर्वाचित यानादीगुलिं सुभाय् देछायेगु ज्याझ्वः याःगु खः ।

नेकपा (एमाले) २३ वडा निर्वाचन परिचालन कमिटीया संयोजक सुनकाजी शाक्यया सभापतित्वय् जूगु ज्याझ्वलय् येँ महानगरपालिकाया निवर्तमान प्रमुख विद्यासुन्दर शाक्यं न्हूपिं जनप्रतिनिधियात बांलाक ज्या याना वने फयेमा धकाः भिंतुना बियादिल ।

वय्कलं थःगु कार्यकालं थम्हं फक्व बांलाक ज्या यानागु व सुयातं नं नुगलय् स्याकेगु ज्या यानाथें मच्वंसां गबलें गबलें ज्या यायेबलय् स्यनीगु वा द्वनीगु जुइफु । अथे खःसां इलय् हे बांलाक विचाः यानाः ज्या यायेत नवनिर्वाचित जनप्रतिनिधियात सुझाव बियादिल ।
वय्कलं थःगु न्यादँया कार्यकालय् विपक्षीयात तकं न्ह्यसः थनेगु लँ बियागु मदु धासें न्हूपिं जनप्रतिनिधिं नं उकथं हे ज्या याना वनीगु विचाः तयादिल ।

येँ महानगरया नवनिर्वाचित उपप्रमुख सुनिता डंगोलं थःपिं आः शासक मखसे सेवक जुयाः महानगरया उन्नति व प्रगतिलिसें महानगरवासीया हितया निंतिं न्ह्याः वनेगु जुइ धयादिल । मतदान सिधयेकाः मतगणना जूगु इलंनिसें हे गुलि गुलि मत ल्याः थहां वन उलि उलि हे थःत जिम्मेवारी नं अप्वया वनाच्वंगु महसुस जूगु धासें थौंया ल्याय्म्हतय् दथुइ राजनीतियात फोहरी कासाकथं कायेगु यानाच्वंगुलिं दुःख प्वंकादिसें सही रुपं चिन्तन मनन याना वनेगु खःसा राजनीति नं छगू महत्वपूर्ण खः धयादिल ।

येँ महानगरपालिका २३ वडाया नवनिर्वाचित वडाअध्यक्ष मचाराजा महर्जनं विगतय् याना ज्यायात निरन्तरता बिया वनेगु नापं न्हापा याये धयां नं याये मफयाच्वंगु ज्यायात आःया कार्यकालय् पूवंकेगु जुइ धयादिल।

लिसें वय्कलं थः वडावासीया निंतिं ज्या याये धकाः वयाम्ह जूगुलिं वडाया हरेक समस्यायात न्ह्यःने तया बीत इनाप यासें उकियात थम्हं फक्व समाधान यायेगु प्रतिवद्धता प्वंकादिल । ज्याझ्वलय् नेकपा (एमाले) २३ वडा कमिटीया नायः किरण मानन्धरं नं नुगःखँ तयादीगु खः ।