
येँ – भारतीय प्रधानमन्त्री नरेन्द्र मोदीं थःगु नेपाः भ्रमणया इलय् नेपालं हःगु छुं छुं प्रस्तावयात ‘इगनोर’ यानादीगु खँ सीदुगु दु । विशेष यानाः भारतीय आयल निगमं ग्याँस हइबलय् नेपाःया हे ग्याँस बुलेट छ्यलेगु धकाः नेपालं यानाच्वंगु तयारीयात भारतं स्वीकृति मबिउनि । नेपाःया ग्याँस बुलेट छ्यलेगु बारे नेपाःया प्रधानमन्त्री केपी ओली भारत वंबलय् नं खँ ल्ह्वंगु खः, तर भारतं उकिया लिसः मबिउ ।
थ्व स्वयां न्ह्यः प्रधानमन्त्री शेरबहादुर देउवा व पुष्पकमल दाहालं नं नेपाःया हे ग्याँस बुलेट छ्यलेगु धकाः खँ तःगु खःसां भारतं उकियात वेवास्ता याःगु खः । थुखे नेपालय् बुलेट न्याना तःपिं व्यापारीत धाःसा समस्याय् लानाच्वंगु दु । उमित बैंकया ब्याज तकं पुले थाकुयाच्वंगु खँ धाःगु दु ।
भारतया यातायात व्यवसायीतय् विरोधं यानाः नेपाःया हे ग्याँस बुलेट चले याके मफयाच्वंगु खः । अथेहे मोदीं न्यने चाहे मजूगु मेगु मुद्दा नेपालं भारत जुयाः अन्तर्राष्ट्रिय उडान यायेत प्यंगू न्हूगु रुटया निंतिं याःगु इनाप नं खः । उकिया लिसः नं भारतं मबिउगु खँ धाःगु दु । मोदीया थुगु भ्रमणय् नं नेपाःया प्रधानमन्त्री ओलीं थ्व खँ न्ह्यथनादीगु खःसां मोदीं उकियात लिसः बियामदीगु खः ।
अथेहे भारतयात भारतय् खारेज जूसां नेपाःमितय्के लानाच्वंगु द्वःछि व न्यासः वंगु भारु सटही यायेगु खँ नं भारतया न्यने मयःगु सीदत । नेपालय् तुं लानाच्वंगु भारु हिलेगु निंतिं नेपालं यक्व हे कुतः यायेधुंकूसां भारतं उकियात सकारात्मक रुपं काःगु मदु । थुगुसी नं प्रम ओलीं वान टु वान वार्ता लिपा पत्रकारतय् न्ह्यःने हे भारु हिलेगु खँ न्ह्यथनादीगु खःसां प्रम मोदीं उकिया लिसः बियामदीगु खः । प्रम ओली नेपाःया बैंकय् दुगु व सर्वसाधारणया ध्यबा याकनं हिलेत प्रम मोदीयात इनाप यानादीगु खः ।
LEAVE YOUR COMMENTS