मन्त्री श्रेष्ठपाखें छत्रपाति चिकित्सालय अवलोकन

येँ- शिक्षा, विज्ञान व प्रविधिमन्धी कृष्णगोपाल श्रेष्ठं थनया छत्रपातिइ च्वंगु छत्रपाति निःशुल्क चिकित्सालयया अवलोकन यानादीगु दु । मन्त्री श्रेष्ठं चिकित्सालयया अवलोकन यानादिसें चिकित्सालययात माःगु स्वास्थ्य सामग्री उपलब्ध याकेत व मेमेगु आवश्यक ग्वाहालि यायेत सरकार तयार दुगु खँ नं धयादीगु दु ।

कोरोनाया निगूगु लहरया महामारी तच्वया वनाच्वंगु इलय् चिकित्सालयपाखें बिया वयाच्वंगु स्वास्थ्य सेवा व उपचारया बारे जानकारी कायेगु ल्याखं मन्त्री श्रेष्ठं वंगु शनिवाः चिकित्सालयया निरीक्षण यानादीगु खः ।

उगु इलय् चिकित्सालयया अध्यक्ष डा. मनोजमान श्रेष्ठं चिकित्सालयं बिया वयाच्वंगु स्वास्थ्य सेवा नापं चिकित्सालया बारे जानकारी याकादीगु खः । येँ महानगरपालिकाया ग्वाहालिइ कोरोना संक्रमितया उपचार यायेगु ल्याखं चिकित्सालययात महानगर विशेष कोभिड अस्पतालया रुपय् संचालन याना वयाच्वंगु दु । उकिया निंतिं येँ महानगरपालिकां चिकित्सालययात आवश्यक स्वास्थ्य सामग्री नापं आवश्यककथं ग्वाहालि याःगु खः ।

उगु इलय् मन्त्री श्रेष्ठं विदेशपाखें ग्वाहालिकथं प्राप्त जुइगु स्वास्थ्य सामग्री उपलब्ध याकेत चिकित्सालयया नां नं धलखय् दुथ्याकागु जानकारी बियादिसें अस्पतालय् अक्सिजन प्लान्टलिसें मेमेगु स्वास्थ्य पूर्वाधारया निंतिं ग्वाहालि यायेत सम्बन्धित मन्त्रीयात नं इनाप यानागु जानकारी बियादिल ।

महानगर विशेष कोभिड अस्पताल संचालन जुयाच्वंगु चिकित्सालययात छुं दिं न्ह्यः जक येँ महानगरं थप निगः भेन्टिलेटर ग्वाहालि याःगु खः ।

सम्बन्धित बुखँ

LEAVE YOUR COMMENTS