कात्ति प्याखंया गुरु श्रेष्ठ मंत

यल(नेपालभाषा टाइम्स)÷ यलया नांजाःगु ऐतिहासिक काति प्याखंया गुरु केशवकृष्ण श्रेष्ठ मंत । कात्ति प्यानय् झण्डै बागू शताब्दीतक वराह भूमिका निर्वाह यानादीम्ह गुरु श्रेष्ठ ८५ दँया वैंशय् वंगु शनिवाः बहनि मदुगु खः । हर्नियाया समस्या जुयाच्वंम्ह वय्कः वासः याकुयाकुं मदुगु खः ।
लिपांगु अवस्था थ्यनेवं वय्कःया पशुपति आर्यघाट यंकूगु खः ।

मदुम्ह श्रेष्ठया पशुपतिइ हे अन्त्येष्ठि यायेधुंकूगु दु । मदुम्ह श्रेष्ठयात वय्कःया तःधिकःम्ह काय अनिलकृष्ण श्रेष्ठं मि तयादीगु खः । मदुम्ह गुरु श्रेष्ठया निम्ह काय व छम्ह म्ह्याय् दी ।

वि.सं. १९९६ भादै १ गते यलय् जन्म जुयादीम्ह श्रेष्ठं २०१४ निसें २०६२ तक मदिक्क कात्ति प्याखनय् बराह जुयाः अभिनय यानादीगु खः । थुकथं हे २०५८ सालनिसें वय्कः कात्ति प्याखंया मू गुरु जुयादीगु खः । थ्यंमथ्यं न्यागू दशक (४८ दँ) तक मदिक्क कात्ति प्याखनय् वराह जुयादीम्ह गुरु केशवकृष्ण श्रेष्ठयात बराहया नामं नं म्हसिउ ।