मिसा खलःया च्याक्वःगु तःमुँज्या

येँ(नेपालभाषा टाइम्स)- नेपालभाषा मिसा खलःया च्याक्वःगु तःमुँज्यां धर्मशोभा तुलाधरयात नायः ल्यःगु दु । वंगु शनिवाः थनया स्वयम्भूस्थित सुनगाभा होम्स–लचना बौद्धिक अपा·ता उतथान समाज)या हलय् जूगु खलःया च्याक्वःगु तःमुँज्यां धर्मशोभा तुलाधरया अध्यक्षताय् न्हूगु ज्यासना पुचः नीस्वंगु खः ।

न्हूगु ज्यासना पुचलय् उर्मिला तुलाधर न्वकु, पे्रमहिरा तुलाधर छ्याञ्जे, पूर्णिमा शाक्य डंगोल दांभरिं व पद्मादेवी ताम्राकारयात लिउछ्याञ्जे ल्यःगु दुसा निम्ह दुजलय् ई. गार्गी प्रधान व नःलि वज्राचार्ययात ल्यःगु दु । मिसा खलःया न्हूगु ज्यासना पुचलय् निर्वाचित जुयादीपिं सकलें निर्विरोध जुयादीगु खः ।

थ्व स्वयां न्ह्यः खलःया नायः मंगला कारंजितया सभापतित्वय् तःमुँज्याया न्हापांगु सत्रया ज्याझ्वः जूगु खः । न्हापांगु सत्रय् खलःया छ्याञ्जे उर्मिला डंगोलं वार्षिक प्रगति प्रतिवेदन न्ह्यब्वयादीगु खःसा दांभरिं उर्मिला तुलाधरं आर्थिक ल्याःचाः न्ह्यब्वयादीगु खः ।

निगुलिं प्रतिवेदनय् राय सल्लाह, सुझाव कायेगु नापं सहलह यानाः पारित याःगु खःसा वइगु आर्थिक दँया निंतिं लेखा परीक्षकया नियुक्ति व पारिश्रमिक क्वःछीगु नापं न्हूगु ज्यासना पुचः ल्ययेत गठन यानातःगु निर्वाचन समितिया नं अनुमोदन याःगु खः ।

न्हूगु ज्यासना पुचः ल्ययेगु निंतिं प्रतापमान शाक्य, शरद कसाः व उदेन न्हूसाय्मि दुथ्याःगु ल्यज्या पुचः गठन याःगु खः ।
ज्याझ्वलय् खलःया संरक्षक सुवर्णकेशरी चित्रकार, नायः मंगला कारंजितं व न्हूम्ह नायः तुलाधरं थःगु नुगःखँ तयादीगु खः ।