26
पासा पुचः गुथिया गुँभ्वय्
येँ(नेपालभाषा टाइम्स)÷ पासा पुचः युके, लन्डनया वार्षिक ज्याझ्वःकथं गुँभ्वय् न्यायेकूगु दु । पार्लियामेन्ट हिल पार्कय् जूगु गुँभ्वजय् गुथिया आपालं दुजःपिंसं ब्वति काःगु खः ।
पासा पुचः गुथि युके लन्दनया मूछ्याञ्जे मय्जु प्रनिशा शाक्यं लसकुस यासें गुँभ्वजय् जुइगु ज्याझ्वःया बारे नं जानकारी बियादीगु खःसा नायः रुक्मणि मानन्धरं सकल पाहांपिंत लसकुस यानादीगु खः ।
बेलायतया मौसमकथं न्हिनसिया तसकं न्ह्यइपुगु इलय् जूगु गुँभ्वजय् ब्वति कायेत वःपिं मस्तलिसें ज्याथजिथिपिंसं उत्साहपूर्वक थीथी गतिविधिइ ब्वति काःगु खः । गुँभ्वजय् थीथीकथंया क्रियाकलापलिसें नापं फेस पेन्टि·, परम्परागत कासा व बिंगो म्हितकेगु ज्या जूगु खः ।
गुँभ्वय् ७ दँ दुम्ह गुथिया दुजः निर्भिका जोशीं क्राफ्ट पाइप क्लिनरपाखें दयेकादीगु ब्रासलेट, खिचा, स्वां, नेल पालिस आदि दयेकाः विक्री यानादीगु खःसा उकियापाखें संकलन जूगु दां गुथिया खाताय् जम्मा यायेत बियादीगु खः ।
गुँभ्वजय् झायादीपिं सकसितं नेवाः नसा ज्वलंया परिकार नकेगु ज्या जूगु खः । सकल पाहापिंसं ज्याझ्वःयात कयाः च्वछायादिसें वइगु दिनय् नं थिपाखें थुकथंया हे ज्याझ्वः ग्वसाः ग्वइगु विश्वास प्वंकादीगु खः ।
ज्याझ्वलय् मूछ्याञ्जे शाक्यं गुँभ्वय् ग्वसाः ग्वयेत थीथी कथं ग्वाहालि यानादीपिं व झायादीपिं सकसितं सुभाय् देछानादीगु खः ।
LEAVE YOUR COMMENTS