न्हूदँ ११४४ या लसताय् थौं देय्न्यंकं सांस्कृतिक र्याली
येँ (नेपालभाषा टाइम्स)÷नेपाल संवत् ११४४ न्हूदँया लसताय् थौं देय्न्यंकं सांस्कृतिक र्याली पिकयाः न्हूदँयात लसकुस यानाच्वंगु दु । थ्व झ्वलय् थौं येँया बसन्तपुलिइ छगू तःजिगु र्याली पिकयाः देय्चाःहिउगु दु । र्याली आपालं बाजं खलः लिसें नेपाली सेनाया शार्दूल जंग गुल्म (गुर्जुया पल्टन) समेत सहभागी जूगु खः । अथे हे यक्वं नेवाः खलः पुचःतय्सं नं ब्वति काःगु खः ।
उकथं हे थौं थिमिइ नं शंखधर साख्वाःया झ्वाता दुथाय् छगू समारोह यासें न्हूदँ हंगु दु । प्रधानमन्त्री पुष्पकमल दाहाल मू पाहाँ कथं झायादीगु ज्याझ्वलय् प्रधानमन्त्री दाहालं शंखधरया झ्वाताय् स्वांमां क्वखायेका भिंतुना बियादीगु दु । अन नेपाल संवत्या प्रवर्तक शंखधर साख्वाःया झ्वाताय् स्वां देछासें न्हूदँ हनेत्यंगु खःसा उगु ज्याझ्वलय् नं प्रधानमन्त्री पुष्पकमल दाहाल हे मूपाहां कथं झाइगु ग्वसाः दु ।
मेखे यलय् नं नेपालभाषा मंकाः खलः, ज्यापु समाज आदि थीथी खलः पुचः जानाः थौं हे न्हूदँया र्याली पिकाःगु दु । यलय् म्हपुजा म्हिगः हे न्यायेकूगु खःसां नं न्हूदँया ज्याझ्वः धाःसा थौं हे याःगु खः । र्याली लिपा जूगु सभाय् प्रधानमन्त्री पुष्पकमल दाहालं सम्बाेधन यानादीगु दु ।
थौं न्हूदँया लसताय् येँया किलागलं मोटरसाइकल र्याली पिकायेगु तयारी जुयाच्वंगु दु । र्याली बागमती प्रदेशया मुख्यमन्त्री शालिकराम जम्कट्टेल लिसें प्रदेशया सांसदपिं बसन्त मानन्धर, शैलेन्द्र वज्राचार्य आदिपिं थ्यनीगु खँ धाःगु दु ।
राष्ट्रपतिया भिंतुना सन्देश ः
न्हूदँ ११४४ या लसताय् राष्ट्रपति रामचन्द्र पौडेलं नं भिंतुना सन्देश जारी यानादीगु दु । राष्ट्रपति पौडेलं जारी यानादीगु भिंतुना सन्देशय् नेपाःया सांस्कृतिक विविधतायात स्वायेगु ज्या नेपाल संवतं यानाच्वंगु दु धासें नेपाल संवत्या प्रणेता शंखधर साख्वाःपाखें याःगु परोपकारी ज्यापाखें प्रेरणा कयाः न्ह्याः वने फयेमा धकाः भिंतुना बियादीगु दु ।
LEAVE YOUR COMMENTS