ने. सं. ११४४ कौलाथ्व तृतीया -

‘पिसिआर परीक्षण मखु, नाका बन्द यायेमाः’

येँ – येँ महानगरपालिकाया मेयर विद्यासुन्दर शाक्यं स्वनिगलय् कोरोना संक्रमितत अप्वयाच्वंगु धासें स्वनिगःयात बचे यायेगु खःसा पिसिआर परीक्षण जक अप्वयेकेगु मखुकि नाका निं न्हापां बन्द यायेमाः धयादीगु दु । श्रीघलय् च्वंगु धर्मकीर्ति विहारय् बौद्ध परियत्ति शिक्षाया विद्यार्थीपिंत सिरपाः लःल्हायेगु ज्याझ्वलय् न्ववानादिसें वय्कलं थ्व खँ धयादीगु खः ।

पिसिआर परीक्षण अप्वयेके माल धकाः सः तच्वया वयाच्वंगु इलय् वय्कलं थ्व खँ धयादीगु खः । वय्कलं धयादीगु दु, ‘पिसिआर वासः मखु । गथे झीसं सुथय् नापय् यानागु ब्लडप्रेसर बहनी मेगु हे जुयाच्वनी, सुथय् जाँच याःगु सुगर बहनी फरक जुइधुंकी । पिसआर नं अथे हे खः । पिसिआरं तत्कालया अवस्था जक धाइगु खः । पिसिआर यायेधुंकूपिंत कोरोना जुइमखु धयागु दइमखु ।’

‘थौंकन्हय् स्वनिगलय् पिने जिल्लां अप्वः मनू वयाच्वन । थुकिं समस्या तच्वया वःगु खः । स्वनिगः दुहां वयेगु नाकाय् कडा यायेफत धाःसा जक थन संक्रमण नियन्त्रण यायेफइ’ वय्कलं धयादीगु दु, ‘थ्व इलय् झी थः हे सचेत जुइमाःगु दु । झी सचेत मजुल धाःसा सरकारं चाहे जुयाः जक कोरोना नियन्त्रणय् वइमखु ।’

येँ महानगरपालिकां न्हापा नं स्वनिगलय् दुहां वयेगु पनेमाः धयाबलय् स्वनिगः दुहां वयेके मबिल धकाः आलोचना याःगु धासें वय्कलं धयादिल, ‘आः स्वनिगलय् यक्व मनू दुहां वःगुलिं हे समस्या तच्वयावःगु खः ।’ अथेहे वय्कलं पिसिआर परीक्षण व्यापक जुइमाल धकाः आन्दोलन यानाच्वंगुयात कयाः नं टिप्पणी यासें जुलुस पिकायेवं कोरोना बिसिउँ वनीमखु, बरु जुलुस लिसेलिसें कोरोना नं पिहां वयेफु, उकिं झी सचेत जुयाच्वनेमाः धयादिल ।

बौद्ध परियत्ति शिक्षाया विद्यार्थीपिंत सिरपाः लःल्हायेगु झ्वलय् वय्कलं येँ महानगरपालिकापाखें थेरवादी, वज्रयानी विहार दयेकेगु निंतिं माःगु ग्वाहालि याना वयाच्वनागु खँ धयादिल । थ्व झ्वलय् वय्कलं नगर दुने बुद्ध विहारया मू भवन, लुमिबनीया वज्रयान महाविहार, जनबहाःया दिगीछेँ, स्वयम्भूया भजन छेँ लिक्क च्वंगु विहार, स्वयम्भूया आनन्दकुटी विहार, किम्डोलया आनन्दभुवन विहार, वानेश्वरया अन्तर्राष्ट्रिय बौद्ध भावना केन्द्रया भवन दयेकेत ग्वाहालि यानागु लुमंकादिल ।