चित्तधरया छेँ जग स्वनीगु

येँ (नेपालभाषा टाइम्स)- कवि केशरी चित्तधर हृदया ११६ बुन्हिया लसताय् लाकाः येँया तुंछेँ गल्लिइ च्वंगु वय्कः बूगु छेँय् नं जग स्वनीगु जूगु दु । थ्वहे वइगु बछलागा एकादशि (जेठ १२ गते) छगू ज्याझ्वःया दथुइ छेँया शिलान्यास याइगु ग्वसाः दु ।

छेँया शिलान्यास परिषद्या पुलांम्ह नायः फणिन्द्ररत्न वज्राचार्यं यानादी । छेँया जग स्वनेगु उगु ज्या नं न्हूगुकथं याइगु खँ धाःगु दु । जग स्वनीबलय् जगय् कवि हृदयं च्वयादीगु नांजाःगु सफू ‘सुगत सौरभ’ यात हे स्वनेगु ज्या जुइ । उगु सफूयात सिजःया बक्साय् तयाः जगय् स्वनीगु खँ धाःगु दु । कवि हृदयं ‘सुगत सौरभ’यात थः सन्तान खः धयाथकूगु खः । तुंछेँ गल्लिया उगु छेँ न्हापा जीर्णोद्धार याःगु खःसां ०७२ सालया भुखाचय् क्षति जूगुलिं आः पूवंक हे पियाः हानं दनेत्यंगु खः ।

वकुन्हु हे सुथय् थनया कालिमाटीइ च्वंगु चित्तधर हृदयया झ्वाताय् स्वां देछायेगु ज्याझ्वः नं तयातःगु दु । उगु ज्याझ्वलय् नं ब्वति कायेगु लागिं परिषदं सकल साहित्यह्यमिपिंत इनाप याःगु दु ।

वयां कन्हय् कुन्हु जेठ १३ गते शुक्रवाः नेपाल प्रज्ञा प्रतिष्ठानय् चित्तधरया लुमंतिइ छगू ज्याझ्वः यासें परिषद्पाखें थीथी सिरपाः लःल्हायेगु ज्याझ्वः जुइ ।