नेपालय् राजनीतिक हिउपाः हयेत ज्यापु जातिया अमूल्य योगदान दु – उपप्रधानमन्त्री
येँ (नेपालभाषा टाइम्स)÷ ज्यापु महागुथिया प्यक्वःगु एकीकृत राष्ट्रिय महाधिवेशन शनिवाःनिसें न्ह्याःगु दु । महाधिवेशनया उलेज्या उपप्रधानमन्त्री व गृहमन्त्री नारायणकाजी श्रेष्ठं शनिवाः तिंख्यलय् जूगु छगू विशेष समारोहय् महाधिवेशनया उलेज्या यानादीगु खः । । ‘ज्यापु जातिया उत्थान, नेपाल राष्ट्रया निर्माण’ नारा बियाः महागुथिया महाधिवेशन न्ह्याःगु खः ।
उलेज्याझ्वलय् न्ववानादिसें उपप्रधानमन्त्री श्रेष्ठं नेपालय् राजनीतिक हिउपाः हयेगु निंतिं ज्यापु समुदायया अमुल्य योगदान दु धयादिल । ‘देशय् समावेशीताया लिसें संघीयता हयेगु निंतिं ज् यापु समुदायया तःधंगु योगदान दु । २०४६ सालया आन्दोलन जुइमा वा २०६२÷६३ या आन्दोलन जुइमा, ज्यापु समुदायं भूमिका अग्रणी व निर्णायक जूगु दु’ वय्कलं धयादीगु दु ।
वय्कलं स्वनिगलय् आन्दोलन न्ह्याकेत ज्यापु महागुथिया अध्यक्ष राजभाइ जकःमिया छेँय् च्वनाः कार्यक्रम दयेकागु खँ नं लुमंकादीगु खः ।
सामाजिक विविधिता दुनेया एकता स्यंकेगु निंतिं ज्या जुइफुगु पाखे सचेत जुइमाःगु खँ धयादिसें वय्कलं ज्यापु जाति थेंज्याःगु किसान, श्रमिक व लोकसंसकृतिया संरक्षक समुदायं देय् विकासया निंतिं अझ प्रभावकारी भूमिका म्हितेमाःगु खँ धयादिल ।
थ्व झ्वलय् वय्कलं सरकार अपराधमुक्त समाज दयेकेगु अभियानय् न्ह्याः वनाच्वंगु खँ धयादिल । ‘समृद्धिया निंतिं सुशासन, सुशासनया निंतिं भ्रष्टाचार व अपराधमुक्त समाज दयेकेगु अभियानय् सरकार दु’ वय्कलं धयादीगु दु । अथेहे वय्कलं भ्रष्टाचार याःपिंविरुद्ध कारवाही प्रक्रियाय् सरकार लिमचिलिगु व दलाल पुँजीया पलेसा राष्ट्रिय पुँजीया प्रवद्र्धन यायेगु खँ धयादीगु खः ।
LEAVE YOUR COMMENTS