डलर बल्लाःगुलिं लुँया भाः कुहां वन

येँ – नेपाःया लुँ वहःया बजारय् वंगु छुं न्हिं न्ह्यवनिसें थहांकुहां जुयाच्वंगु दु । म्हीग जक लुँ छतोलाय् ९०० तका कुहां वंगु खःसा म्हिगः हाकनं ५०० तका थहां वंगु दु । अन्तर्राष्ट्रिय बजारय् लुँ न्याइपिं स्वयां नं मीपिं अप्वयेवं आः हाकनं लुँया भाः कुहां वयाच्वंगु खँ नेपाल सुनचाँदी व्यवसायी महासंघया पुलांम्ह अध्यक्ष तेजरत्न शाक्य ‘नेपालभाषा टाइम्स’यात कनादीगु दु ।

उकथं हे डलर बल्लायेवं लुँइ लगानी यानाच्वंपिंसं नं डलर हे सञ्चिति यानाहःगुलिं नं लुँया भाः कुहां वयाच्वंगु खः । लुँया भाः कुहां वयाः ९५००० तका थ्यनेफइगु अनुमान नं वय्कलं यानादीगु दु ।

रुस व युक्रेन दथुइ जूगु युद्धया कारणं यानाः लुँया भाः थहां वनी धकाः बिचाः याःगु खःसां नं उकिया लिच्वः अन्तर्राष्ट्रिय बजारय् मलायेवं लुँया भाः कुहां वयेगु शुरु जूगु खः ।

लुँया भाः थहां वनाः छतोलाया १ लाख ५ हजार ५ सय तक थ्यनेधुंकूगु खःसां आः हाकनं बुलुहुँ भाः कुहां वयाच्वंगु दु । म्हिगः अन्तर्राष्ट्रिय बजारय् प्रतिऔश १८१७ डलर कायम जूगु खःसा म्हीग १८०९ डलर कायम जूगु खः । थ्व भाः कुहां वयाः १८ सय स्वयां म्हो जुइफुगु अनुमान भाजु शाक्यया दु ।

मेखे अन्तर्राष्ट्रिय पेट्रोलियम बजारय् पेट्रोलियम पदार्थया भाः थहां वनी धकाः अनुमान जुयाच्वंगु खःसां पेट्रोलियम पदार्थया भाः थहां मवंगुलिं नं लुँया भाः कुहां वयेत ग्वाहालि जूवंगु विश्लेषण वय्कःया दु । म्हिगः अन्तर्राष्ट्रिय पेट्रोलियम पदार्थया भाः अन्तर्राष्ट्रिय बजारय् प्रति ब्यारेल ११० तका कायम जूगु खः ।

सम्बन्धित बुखँ

LEAVE YOUR COMMENTS