गुकथं सीकल एटिएमं ध्यबा लुटे याःगु

येँ – नेपाःया एटिएम ह्याक यानाः ध्यबा लुटे याःपिं न्याम्ह चिनियाँतय्त शनिवाः प्रहरीं ज्वंगु दु । थुपिं न्याम्हेसितं नबिल बैंकया कर्मचारीतय् सतर्कतां यानाः ज्वनेफुगु खँ धाःगु दु ।

थुपिं ह्याकरतय्सं दकलय् न्हापां नबिल बैंकया कमलादीइ च्वंगु एटिएम पाखें ध्यबा लुटे याःगु खः । शनिवाः बिदा जूगुलिं बैंकतय्सं एटिएमय् शुक्रवाः हे आइतवाः तकया निंतिं गाक्क ध्यबा तयाथकेगु याइ । बिदा जूसां बैंकतय्सं प्राविधिक समस्या ज्यंकेगु निंतिं एटिएम स्वइपिं कर्मचारीत धाःसा खटे यानातःगु दइ । थथे खटे यानातःपिं नबिल बैंकया कर्मचारीतय्सं शनिवाः आकाझाकां कमलादीइ च्वंगु निगुलिं एटिएमय् ध्यबा खालि जूगु खन । अस्वाभाविक रुपं थथे एटिएमया ध्यबा खालि जूगु खनेवं उपिं कर्मचारीतय्सं थः सुपरभाइजरयात खबर यात ।

सुपरभाइज वयाः स्वःवःबलय् प्रभु बैंकया झिंस्वंगूति कार्ड छ्यलाः धमाधम ध्यबा लिकयाच्वंगु लुइकल । थथे झिंस्वंगू कार्ड ध्यबा लिकयायंकूगु खनेवं सिसिटिभीया फुटेज स्वल । थ्व फुटेजय् एटिएमय् ध्यबा लिकयाच्वंम्हेसिनं धमाधम ध्यबा लिकयाः स्कुल ब्यागय् ध्यबा तयाच्वंगु खन । सिसिटिभीया फुटेजय् उपिं विदेशी जुयाच्वंगु नं खंकल ।

थथे सिसिटिभीया फुटेज स्वयाच्वंगु इलय् हे नबिलया हे दरबारमार्गय् तीनधाराय् च्वगु केन्द्रीय बैंकय् तयातःगु एटिएमं नं थथे हे ध्यबा पिहां वनेगु सुरु जुल । थुबलय् कर्मचारीतय्सं सिसिटिभीइ लाइभ हे स्वयाच्वंगु जुयाच्वन । कमलादीया एटिएमय् थें ध्यबा लिकयाः धमाधम तयाच्वंगु खनेवं तुरुन्त हे अनया सुरक्षाकर्मीयात धयाः उम्ह मनूयात ज्वंकेबिल सा प्रहरीइ नं खबर यात ।

सुरक्षाकर्मीं ज्वंम्ह उम्ह मनू चिनियाँ नागरिक जुयाच्वन । प्रहरीं उम्ह चिनियाँयाके न्यनेकने यानाः होटल माया मनोरमाय् च्वनाच्वंपिं मेपिं प्यम्हेसित नं ज्वंगु खः । उमिगु पाखें प्रहरीं १ करोड ४० लाख तका व ९ हजार डलर नं बरामद याःगु दु । प्रहरीं थ्व लुटय् दुथ्याःपिं मेपिं नं चिनियाँत दुगु व उपिं फरार जुयाच्वंगु खँ धाःगु दु ।
बैंकया कर्मचारीतय्सं एटिएमं ध्यबा पिहां वंगुयात स्वाभाविक रुपं कयाः वास्ता मयाःगु खःसां लुटेरातय्त ज्वनेत हे थाकुइगु खँ धाःगु दु ।

गुकथं लुटे यात

चिनियाँतय्सं याःगु थ्व लुट ‘हाइटेक फ्रड’ जूगु खँ धाःगु दु । उमिसं छ्यःगु प्रविधि नेपालय् आःतक जूगु लुट मध्ये दकलय् हाइटेक प्रविधि छ्यःगु लुट जूगु खँ धाःगु दु ।

उमिसं नेपालय् बैंकतय् संजाल दुगु नेपाल इलेक्ट्रोनिक पेमेन्ट सिस्टम (नेप्स) व भिसाया दथुइ च्वनाः एटिएमं ध्यबा लिकायेगु ज्या याःगु खः । चिनियाँ लुटेरातय्सं कार्ड स्वाइप यायेवं उकिया विवरण भिसा प्रोसेसरय् वनी, भिसां नेप्सय् स्वापू तइ, अले नेप्सं धमाधम भुक्तानी स्वीकृत याःगु खनेदुगु खः । निगू प्रविधिया दथुइ च्वनाः याःगु थ्व लुटय् लुटेरातय्सं बैंकय् च्वंगु सुयागुं खाताय् सनाच्वने म्वाः । एटिएमय् तयातःगु ध्यबा जक ख्वारख्वार पिहां वयेगु जूगु खः । उकिं थ्व लुटय् सुयागुं खाताय् च्वंगु ध्यबा पिहां मवंगु खँ राष्ट्र बैंकं धाःगु दु ।

सम्बन्धित बुखँ

LEAVE YOUR COMMENTS