पेट्रोल स्वयां विद्युतीय सवारी किफायती

स्वनिगःया सतकय् पेट्रोलियम पदार्थं चले जुइगु सवारी साधनया अप्वः दु । पेट्रोलियम पदार्थं चले जुइगु सवारी साधन स्वयां विद्युतीय सवारी साधन संचालनय् किफायती व खर्च नं म्हो जूसां स्वनिगःया सतकय् धाःसा पेट्रोलियम पदार्थं चले जुइगु सवारी हे अप्वः दु । पेट्रोल स्वयां विद्युतं चले जुइगु सवारी संचालनय् खर्चया ल्याखं प्रतिकिलोमिटर ४ तका दां दंक लाःगु खनेदु ।नेपाल विद्युत प्राधिकरणं याःगु छगू अनौपचारिक अध्ययनकथं थौंकन्हय् संचालनय् दुगु डिजेल बसया इन्जिनं प्रतिकिलोमिटर १६/८० पैसाया इन्धन खपत जुयाच्वंगु दुसा विद्युतं चले जुइगु बसं प्रतिकिलोमिटर १२/९६ पैसाया विद्युत खपत जुयाच्वंगु दु । पेट्रोलियम पदार्थं चले जुइगु सवारी साधनस्वयां विद्युतं चले जुइगु सवारी चले यायेबलय् ४५ प्रतिशत दंकं लाःगु खनेदु । १ लिटर डिजेलं मात्र न्यागू किलोमिटरया यात्रा याये फइसा ३२४०/– तका खर्च यानाः ३२४ किलोवाट आवर विद्युत चार्ज यायेबलय् उकिं २५० किलोमटिरया यात्रा याये फइगु प्राधिकरणया अध्ययनं क्यंगु दु ।

अथे हे प्रतिलिटर १०४ तकां न्याःगु पेट्रोलपाखें छगः कारं १६ किलोमिटर तक यात्रा याये फइ । थ्व हे आधारय् स्वयेगु खःसा प्रतिकिलोमिटर ६/५० पैसा खर्च जुइ । १५० तका खर्च यानाः १५ किलोवाट आवर विद्युत चार्ज याःगु विद्युतीय कारं प्रतिकिलोमिटर स्वम्वः तकां याये याये फइ । सामान्यतः १५ किलोवाट आवरया विद्युतं १०० किलोमिटरया यात्रा याये फइगु प्राधिकरणं न्ह्यथंगु दु । प्राधिकरणया अनौपचारिक अध्ययनकथं १०४ तका पुलाः १ लिटर पेट्रोल मोटरसाइकलय् तयेबलय् उकिं ४० किलोमिटर यात्रा याये फइ । थ्व ल्याखं प्रतिकिलोमिटर २/६० पैसा खर्च तुइ । विद्युतीय मोटरसाइकलय् धाःसा मात्र ३७ पैसां १ किलोमिटरया यात्रा याये फइ ।

प्राधिकरणयाकथं २२ तकाया विद्युत प्रयोग यायेबलय् विद्युतीय मोटरसाइकलं ६० किलोमिटरतकया यात्रा याये फइ । प्रतिकिलोमिटर ३७ पैसाय् यात्रा ययो फइ । पेट्रोल स्वयां विद्युतीय मोटरसाइकलया खर्च २/२३ पैसा प्रतिकिलोमिटर दंक लाइगु खनेदु । प्राधिकरणया कार्यकारी निर्देशक कुलमान घिसिङया कथं विद्युतीय सवारी साधन प्रयोगयात प्राथमिकता बीत अनौपचारिक रुपं हे जूसां थुकथं अध्ययन यानागु वव उकिया सकारात्मक लिच्वः वयाच्वंगु दु । प्राधिकरणं पाइलट प्रोजेक्टया रुपय् प्राधिकरण परिसरय् विद्युतीय सवारी साधन चार्जया निंतिं स्टेशन तकं चायेकूगु दु । देय्न्यंकं थीथी थासय् पेट्रोल पम्प थें चार्जिङ स्टेशन नं चायेकेगु योजनाय् प्राधिकरण दु ।

थ्व हे झ्वलय् साझा यातायातं नं निकट भविष्यय् स्वनिगःया थीथी न्हय्गू थासय् विद्युतीय सवारी साधन चार्ज यायेगु निंतिं चार्जिङ स्टेशन संचालन यायेगु तयारी याःगु दु । विश्वन्यंकं लोकंह्वाना वनाच्वंगु विद्युतीय सवारी साधनया प्रयोगयात प्रोत्साहित याना यंकाः पेट्रोलियम पदार्थया निर्भरता म्हो यायेत प्राधिकरणं ‘हाई भोल्टेजथ चार्जर स्टेशन’ निर्माण यायेगु नीतिं नं हयागु कार्यकारी निर्देशक घिसिङया धापू दु । राज्य व जनस्तरं तकं पेट्रोलियम पदार्थया विश्वस्त विकल्पया रुपय् विद्युतीय सवारी साधन न्यायेगु व उकिया प्रयोगया निंतिं सशक्त रुपं कुतः जुइमाःगु आवश्यक खने दु ।

पेट्रोल पम्प थें हे थाय्थासय् सहज रुपं चार्ज याये फइगु ‘हाई भोल्टेज चार्जर स्टेशन’ निर्माणया निंतिं गृहकार्य जुयाच्वंगु नापनापं प्रक्रियातकं न्ह्याकेधुंकूगु दु । प्राधिकरणं येँय् लिपा विराटनगर, वीरगंज, पोखरा, भरतपुर व नेपालगंजय् नं उकथं चार्जर स्टेशन चायेकेत्यंगु दु । सर्वसाधारणयात बानी यायेगु निंतिं प्रस्तावित चार्जर स्टेशनय् शुरुया इलय् निःशुल्क रुपं सेवा बी । देय्या राष्ट्रिय प्राथमिकताय् लाःगु मथिल्लो तामाकोशी जलविद्युत आयोजना निर्माण सम्पन्न जुइवं चान्हसिया इलय् व बर्खाया इलय् विद्युत सितिं वनीगुलिं विद्युतीय सवारी प्रवद्र्धनय् लगे जुइकथं प्राधिकरणं तयारी याःगु दु । सन् २०३०तकया दुने भारत, बेलायत, फ्रान्स, नर्वे थेंज्याःगु विकासशील देशं विद्युतीय सवारी साधनया प्रयोग यायेगु व डिजेल व पेट्रोलं चले जुइगु सवारी साधनयात विस्थापन यायेगु नीति काःगु दु ।