लिपि व नेवाः भाय् स्यनेगु कक्षा संचालन याये

छिगु एजेन्डा छु खः ?
— वडा ज्याकू व्यवस्थित रुपं संचालन यानाः सहज रुपं सेवा बी । वडाय् वये मफुपिंत छेँय् छेँय् वनाः सेवा बी । वडाया बजेट उपभोक्ता समिति गठन यानाः इमिगु हे सल्लाह व सुझावकथंया योजनाय् खर्च याये । फोहरया व्यवस्थापन, रात्रीकालीन सुरक्षाया निंतिं सतक मतलिसें सीसी क्यामराया व्यवस्था यायेगु जुइ ।
सरकारी स्कुलया उचित व्यवस्थापन यानाः फक्व अप्वः स्थानीय मस्तय्सं अध्ययन याये फइगु वातावरण निर्माण यायेगु, वडान्यंकं स्वास्थ्य शिविर संचालन यानाः सेवा बीगु व ज्येष्ठ नागरिकया निंतिं सहज रुपं भत्ता वितरण व विशेष ज्याझ्वः हयेगु जुइ ।

वडाय् दुगु मुख्य समस्या छु खः?
वडाया समस्या धइगु मेमेगु वडाय् थें हे फोहर, सतक मत, धःया व्यवस्थापन खः । नापं वडावासीया निंतिं शान्ति सुरक्षाया व्यवस्था यायेमाःगु नं समस्याया रुपय् दुगु जिं खना । थ्व बाहेकं वडा दुनेया सम्पदाया संरक्षण नं यायेमाःगु दु । वडा दुनेया आपालं सम्पदा मर्मत, पुनःनिर्माण व जिर्णोद्वार यानाः उकिया संरक्षण यायेमाःगु दु । थुकियात प्राथमिकताया आधारय् ज्या न्ह्याकेगु जुइ ।

छि निर्वाचित जुइगु आधार छु दु ?
वंगु स्वंगू दशक न्ह्यवंनिसें जि राजनीति व सामाजिक ख्यलय् सक्रिय जुयाच्वनागु दु । इमान्दार जुयाः थ्व ख्यलय् क्रियाशील जि छम्ह ल्याय्म्हम्ह उम्मेदवार नं खः । प्राकृतिक विपद्, भुखाय् व कोरोना संक्रमणया इलय् उद्धार, राहत व खोपया व्यवस्था यानागु दु । न्हापाया चुनावय् बूसां जिं वडावासीया निंतिं सहज रुपं फक्व सेवा बियागु कारणं जि थुगुसी निर्वाचित जुइ धइगु विश्वास दु ।

छि निर्वाचित जुल धाःसा न्हापां छु यानादी ?
न्हापां ला अव्यवस्थित जुयाच्वंगु वडा ज्याकूयात व्यवस्थित याये । अथे हे फुटपाथत चिइकाः व्यवस्थित यायेगु नापं सुरक्षा निकायलिसे सहकार्य व समन्वय यानाः वडाय् शान्ति सुरक्षा कायम यायेगु स्वये ।

भाषा, कला, संस्कृतिया उत्थानया निंतिं छिगु योजना छु दु ?
सरकारी व निजी स्कुलय् स्थानीय भाषा ब्वंकेगुलिइ प्राथमिका बी । नापं झीगु म्हसीका जुयाच्वंगु लिपि स्यनेगु निंतिं कक्षा संचालन नापं नेवाः भाय् स्यनेगु नं कक्षा संचालन याये । परापूर्वकालनिसें चले जुया वयाच्वंगु जात्रा, पर्व संस्कृतियात संरक्षण नापं आवश्यक बजेटया व्यवस्था याये ।