पूर्वाधारया ४२ अर्ब गन वन ?

पेट्रोलय् काःगु पूर्वाधार करयात प्यखेरं विरोध

येँ – सरकारं पूर्वाधार करया नामय् पेट्रोलियम पदार्थय् प्रति लिटर १० तका दां कायेगु निर्णय यायेवं उकिया विरोध जूगु जक मखु थ्व स्वयां न्ह्यः उठे यानातःगु ४२ अर्ब तका गन छ्वत धइगु न्ह्यसः नं पिहां वःगु दु । सरकारं छुं दँ न्ह्यः बुढीगण्डकी परियोजना न्ह्याकेगु धकाः पेट्रोलय् प्रति लिटर ५ तका कर कायेगु शुरु याःगु खः ।

अथे यानाः कयातःगु कर ४२ अर्ब तका थ्यनेधुंकलं नं उकियात प्रयोग याःगु मदुनि । उलि जक मखु थ्व ध्यबा आः गन दु धइगु खँ तकं सुनां मसिउ । बुढीगण्डकीइ उकियात प्रयोग याये मफयेवं उकियात ‘पूर्वाधार कर’ धइगु नां तयाः कायेगु शुरु याःगु खः । आः वहे करय् मेगु ५ तका थपे यानाः प्रति लिटर १० तका याःगु खः ।

थुकिं यानाः विश्वन्यंकं पेट्रोलियम पदार्थया भाः कुहां वयाच्वंगु इलय् नं नेपालय् धाःसा भाः थहां वनीगु खनेदु धकाः विरोध याना हःगु दु ।
नेपाः सरकारं धाःसा थौंकन्हय् भारतय् सिबें नं नेपालय् पेट्रोलियम पदार्थया भाः दनाच्वंगु कारणं नेपाःया पेट्रोल भारतय् चोरी निकासी मजुइमा धकाः नेपालय् नं भाः थिके यायेमाःगु कारणं कर बढे यायेमाःगु खः धइगु तर्क बियाहःगु दु ।

भारतय् सिबें नेपालय् भाः कुहां वल धाःसा चोरी निकासी पनेमाः धकाः नेपालय् नं भाः थकायेमालीगु थज्याःगु तर्क सरकारं न्हापा पञ्चायत कालंनिसें तयेगु याना वयाच्वंगु खः । भारतय् जुइगु चोरी निकासीयात पनेगु मस्वसे अःखतं भाः थकायेगु ज्याय् कमिशनया तःधंगु खेल दुगु खँ धायेगु याः ।

थ्व करे थपे यानाः कायेगु ज्यायात थीथी उपभोक्ता समितितय्सं नं विरोध याना हःगु दुसा संसदय् नं थौंकन्हय् न्हिंन्हिं थुकिया विरोधय् सः थ्वयाच्वंगु दु । संसदया स्वीकृति मकासे छुं नं कथंया कर कायेगु अधिकार सरकारयाके मदु धासें सरकारं संसदयात छले यानाः ‘पूर्वाधार कर’ काःगु धासें विपक्षी सांसदतय्सं सः तयाच्वंगु दु । सरकारं काःगु थ्व कर तुरुन्त खारेज यायेमाःगु माग विपक्षीतय्सं यानाच्वंगु दु ।

सरकारयात निगमया ६ अर्ब
सरकारं उठे यानाच्वंगु ‘पूर्वाधार कर’ वापत नेपाल आयल निगमं नेपाल सरकारं हरेक दँय् १ अर्ब तका पुलेगु यानाच्वंगु दु । थ्व प्रति लिटर ५ तकाया दरं पुलीगु खः । आः प्रति लिटर १० तका काइगु जुइवं निगमं दँय् २ अर्ब तका पुले मालीगु जुइ ।

आयल निगम सूत्रं धाःकथं निगमपाखें पेट्रोलया भंसार कर लगायत थीथी कथंया कर वापत सरकारयात दँय् ६ अर्ब तका पुलेगु यानाच्वंगु दु । पेट्रोलियम पदार्थ अत्यावश्यक ज्वलं खः धकाः सरकारं गनं नं छुट बीगु ज्या मयाः । यदि करय् जक छुट बिउसां नेपालय् पेट्रोलियम पदार्थ दंक बी फइगु खँ नं निगम स्रोतं धाःगु दु ।