त्याःसा यायेगु, बूसा याये मखु धइगु जुइमखु – मचाराजा महर्जन । पारिश्रमिक व भत्ताया कोष दयेकाः विपन्नया निंतिं खर्च याये – उत्तम रत्न मानन्धर

वइगु वैशाख ३० गते जुइत्यंगु स्थानिय निवार्वानया झ्वलय् येँ महानगरपालिका २३ वडाया अध्यक्षया निंतिं नेकपा एमालेपाखें मचाराजा महर्जन व नेपाली कांग्रेसपाखें उत्तम रत्न मानन्धरं उम्मेदवारी बियादीगु दु । वय्कःपिंलिसे चुनावी एजेन्डायात कयाः  जूगु खँल्हाबल्हा न्ह्यब्वयाच्वना ।

त्याःसा यायेगु, बूसा याये मखु धइगु जुइमखु ः मचाराजा महर्जन

छिगु मू मू एजेन्डा छु छु खः ?
— वडावासीया जनजीविकानाप स्वानाच्वंगु थीथी समस्यायात व्यवस्थापन यायेगु, पूर्वाधार विकास व सुधारलिसें शिक्षा, स्वास्थ्य, सम्पदा, संस्कृतिया संरक्षण व संवद्र्धन यायेगु उद्देश्य कयागु दु । लिसें सामाजिक सुरक्षा, विपद् व्यवस्थापननापं आवश्यकताकथं प्राथमिकता बियाः ज्या यायेगु थुगुसीया चुनावया मू एजेन्डा खः ।

वडाया मुख्य समस्यात छु छु खः ?
— २३ वडाया मुख्य समस्या धइगु ट्राफिक व्यवस्थापन, अव्यवस्थित पार्किङ, विपद्या इलय् दमकल दुहां वने मफइगु लँ खःसा अज्याःगु थासय् च्वंगु व छेँ क्वं वनाच्वंगु धःया निकासयात सहज व्यवस्थापन यायेमाःगु खनेदु ।
लिसें अस्तव्यस्त तारयात व्यवस्थित यायेमाःगु मुख्य चुनौति खः।

छि निर्वाचित जुइ धइगु आधार छु ?

— हाकनं वडाअध्यक्षय् निर्वाचित जुइगु आधार धइगु ०७४ सालया निर्वाचनया इलय् जिं व्यक्त यानागु प्रतिवद्धता गुलि नं उकियात पूवंकागु छगू आधार खः । अबलय् व्यक्त यानागु लगभग दक्वं धइथें प्रतिवद्धता पूवंकागु दु । लिसें वडास्तरं याये फइगु व केन्द्रया सहकार्य व समन्वयय् यायेमाःगु ज्या नं पूवंकागु मेगु आधार खः । थुकथं हे स्थानीय समुदायनाप सहकार्य यानाः मिसा, मस्त, ज्येष्ठ नागरिकया निंतिं नं आवश्यककथं आपालं ज्या यानागु नं आधार दु । वडावासीं उकिया मूल्यांकन यानाः जितः निर्वाचित यानादी धइगु विश्वास दु ।

निर्वाचित जुयादिल धाःसा न्हापां छु यानादी ?
— दकलय् न्हापां प्रतिवद्धताकथंया ज्या न्ह्याके । उकिया निंतिं योजना तर्जुमा यानाः तत्काल, मध्यकाल व दीर्घकालीन छुटे याये । उकियात छगू क्यालेण्डर हे दयेकाः योजनायात कार्यान्वयनय् यंकेगु जुइ ।

वंगु न्यादँया दुने यानादीगु ज्यां गुलि सन्तुष्ट जुयादिया ?
— न्यादँया कार्यकालय् यानागु ज्यां जि पूर्णरुपं सन्तुष्ट । छाय्कि उगु इलय् गुलि नं प्रतिवद्धता प्वंका उकियात कार्यान्वयन यानागु दु । योजना व प्रतिवद्धता कार्यान्वयन यायेत वडावासी सकसिनं थःथःगु थासं माक्व ग्वाहालि नं यानादीगु दु । वडावासीया ग्वाहालिं हे अबलय् व्यक्त यानागु प्रतिवद्धता ९० प्रतिशतं मल्याक पूवंकेत ताःलाःगु दु । उकिया लिच्वःपाखें आम वडावासी नं सन्तुष्ट हे जूगु जिं खना ।

स्थानीय भाषा, कला, संस्कृतिया उत्थानया निंतिं छिगु योजना ?
— थुकिया निंतिं जिगु सक्रियता व क्रियाशीलता न्हापा थें हे दयाच्वनी । निर्वाचित जूसा यायेगु मखुसा याये मखु धइगु जुइमखु । आः हाकनं निर्वाचित जुल धाःसा झीगु पहिचानलिसे स्वानाच्वंगु थ्व विषयय् अझ धिसिलाक्क व क्वातुक भूमिका म्हितेगु जुइ । गथे वंगु कार्यकालय् विधायन समितिइ च्वनाः सामुदायिक ब्वनेकुथिइ नेपालभाषा अनिवार्य ब्वंकेत माःगु कानून निर्माण, सम्पदामैत्री भवन निर्माणयात अनुदान बीत कानून दयेका आः नं उकथं हे सक्रिय जुइ । अथे हे मरुसतःलिसें मेमेगु सम्पदा पुनःनिर्माणया निंतिं आवश्यक कार्यविधि व निर्देशिका दयेकेत नं जिं थःगु थासं रचनात्मक भूमिका म्हितागु दुसा आः नं थम्हं फुगु भूमिका म्हिता हे वनेगु जुइ ।

पारिश्रमिक व भत्ताया कोष दयेकाः विपन्नया निंतिं खर्च याये ः उत्तम रत्न मानन्धर

चुनावय् छिगु एजेन्डा छु खः ?
— वडायात भ्रष्टाचार मुक्त यानाः सुशासन कायम याये । कोभिडं शिथिल जूगु पर्यटन व्यवसाययात पुनर्जीवित यायेगु नापं झीगु मौलिक जात्रा, पर्व, संस्कृतियात अन्तर्राष्ट्रय् प्रचार यानाः पर्यटक दुकाये ।
शिक्षा, स्वास्थ्य व रोजगारीयात प्राथमिकता बी । वडाअध्यक्षय् निर्वाचित जुल धाःसा पारिश्रमिक व छुं नं कथंया भत्ताया छगू कोष खडा यानाः विपन्न व निम्न आय दुपिनिगु निंतिं खर्च याये । रोजगार व शीपमूलक तालिमया व्यवस्था याये ।

वडाय् दुगु मुख्य समस्या छु खः ?
— मुख्य समस्या ला पार्किङ, ट्राफिक जाम, फोहर व्यवस्थापन हे खः । नापं छुं नं कथंया दुर्घटना व थ्व वडाय् आपालं गल्ली दुगुलिं अन दुने च्वंगु छेँ मिं नइगु व मेगु छुंकथंया विपदय् लाइबलय् तत्काल उद्धार यायेगु व अस्पताल यंकेत समस्या दु । थाय्थासय् तू नकातःगुलिं सतकय् नं सहज रुपं दमकल, एम्बुलेन्स थेंज्याःगु सवारी साधन यंके फइगु अवस्था मदु । भुखाचं क्षति जूगु निजी संरचना नं पुनःनिर्माण जुइ फयाच्वंगु मदु । थुकिं यानाः थप क्षति जुइगु सम्भावना दु । उकियात निर्मूल यायेमाःगु दु ।

छि निर्वाचित जुयादी धइगु आधार छु दु ?
०५४ सालय् निर्वाचित वडासदस्य जुयाः ज्या यायेधुंगु दु । जिं अबलय् यानागु ज्याया मूल्यांकन यानाः वडावासीं थुगुसी वडाअध्यक्षय् निर्वाचित याइगु धइगु जितः विश्वास दु । जिं वडावासी समक्ष प्वंकागु प्रतिवद्धता नं जिगु विजयया आधार खः ।

निर्वाचित जुल धाःसा न्हापां छु यानादी ?
जिं न्ह्यब्वयागु प्रतिवद्धता वा एजेन्डायात फयां फक्व व्यवहारय् लागू यायेगु कुतः याये । आवश्यकथंया योजनायात प्राथमिकता बियाः कार्यान्वयनय् यंकेगु बचं बियाच्वना । वडा व वडावासीया आवश्यकतायात थुइकाः प्राथमिकता बिया वनेगु जुइ ।

स्थानीय भाषा, कला, संस्कृतिया उत्थानया निंतिं छिगु योजना ?
— स्थानीय भाषा धइगु हे झीगु मांभाय् खः । थुकियात कालान्तरतक ल्यंका तयेत भाषाविद्तनापं विज्ञतनाप सहलह यानाः भाषा सम्बन्धी जनचेतना थनेगु निंतिं ज्या यायेगु जुइ । भाय् ल्हायेगुलिइ वयाच्वंगु विचलनयात पनेत चेतनामूलक अभियान न्ह्याके ।
कला, संस्कृतिया उत्थानया निंतिं सम्बन्धित त्वाः, गुथिया नायः, गुथ्याः, जानकारतलिसें विद्वानत नाप सहलह यानाः आधारभूत आवश्यकता कथं फक्व आर्थिक ग्वाहालि जक मखु भौतिक रुपं नं ग्वाहालि याये ।
भाषा, कला, संस्कृति झीगु निंतिं गहन विषय जूगुलिं थ्व सम्बन्धय् खँ ल्हायेगु जक व्यवहारय् नं खने दयेका लागू यायेत जिं थःगु थासं फक्व ग्वाहालि यायेगु प्रतिवद्धता नं प्वंकाच्वना ।

सम्बन्धित बुखँ

LEAVE YOUR COMMENTS