संचार मन्त्री, रासस व नेपाल टेलिभिजनयात सुभाय् देछाल

येँ (नेपालभाषा टाइम्स)- नेवाः समुदाय व सम्बद्ध थीथी खलः पुचःतय्सं राष्ट्रिय समाचार समिति व नेपाल टेलिभिजनपाखें नेपालभाषा समाचार न्ह्याकूगुलिं संचार तथा सुचना प्रविधि मन्त्री पृथ्वीसुब्बा गुरुङलिसें नेपाल टेलिभिजन व राससया पदाधिकारीपिंत सुभाय् देछायादीगु दु ।

प्रतिनिधि सभाया सांसद व पुलांम्ह मन्त्री कृष्णगोपाल श्रेष्ठ, नेपालभाषा एकेदेमिया भाइस चान्सलर मल्ल के सुन्दर, सदस्य सचिव पुष्पराज राजकर्णिकार, नेवाः देय् दबूया नायः पवित्र कसाः, न्वकु उमेश स्थापित, भाषा आयोगया दुजः सुरेश मानन्धर, नेपाल संवत् न्हूदँ राष्ट्रिय समारोह समितिया नायः प्रा डा नरेशमान बज्राचार्य, विराट गुथिया नायः महेन्द्र गोपाल कर्माचार्य, ज्ञानराम श्रेष्ठ, उमेश स्थापित, नेवाः अनलाइन न्युजया सम्पादक सुजीव वज्राचार्य, शंखधर प्रतिष्ठानया नायः ज्ञानराम श्रेष्ठ लगायतयापिंसं मन्त्री सुब्बाया लिसें नेपाल टेलिभिजन व राससया पदाधिकारीपिं नापलासें सुभाय् देछायादीगु खः ।

वय्कःयापिंसं मन्त्रालय वनाः मन्त्री गुरुङयात नापलानाः सरकारी सञ्चार माध्यमय् नेपालभाषाया लिसें मैथिली व दनुवार भाय्या बुखँ न्ह्याकाः सरकारं समावेशी समाज दयेकेगु निंतिं यानादीगु ज्यायात च्वछायादीगु खः ।
अथेहे राससया ज्याकुथिइ वनाः अध्यक्ष धर्मेन्द्र झा लिसें मातृभासं समाचार बुलेटिन पिथनेत पहलकदमी काःपि रासस व्यवस्थापन, कर्मचारीपिंत नापलासें वय्कःपिंत खादां क्वखायेका हनेज्या यानादीगु खः ।
राससं वंगु असोज २९ गतेनिसें नेपालभाषा व मैथिली भाषां समाचार सेवा न्ह्याःकुगु खः . नेवाः व मैथिली भाय्या समाचार सेवाया उलेज्या सञ्चार व सूचना प्रविधि मन्त्री पृथ्वीसुब्बा गुरुङं कात्तिक ४ गते यानादीत्यंगु दु ।

अथेहे वय्कःपिंसं नेपाल टेलिभिजनया ज्याकुथिइ वनाः टेलिभिजनया महाप्रबन्धक फुलमान बल तामाङ, एनटिभी न्युजया प्रमुख पुष्पहरि क्याम्पा राईपिंत नापलानाः खादां क्वखायेकाः हनेज्या यानादीगु खः । वय्कःपिंसं नेपाल टेलिभिजनया समावेशी समाचार उत्पादन कक्ष व टेलिभिजनया समाचार प्रसारण कक्ष चाःहिलाः समाचार प्रसारणय् ज्या यानादीपिंत हःपाः बियादीगु खः ।