खसिया ला नं मन्त, खाया धाःसा अभाव मजुइगु

येँ – स्वनिगलय् मेय्या लाया अभाव लिसें खसीया ला पसः नं बन्द जुइगु सुरु जूगु दु । स्वनिगलय् खसी आपूर्ति मजुइवं पसः बन्द यायेमाःगु अवस्था वःगु खँ व्यापारीतय्सं धाःगु दु । नेपाल माछा मासु व्यवसायी संघया संरक्षक लिसें खसीया थोक बिक्रेता दिलबहादुर खड्गीं सरकारं ‘लकडाउन’ घोषणा यायेवं थःपिंसं खसी आपूर्ति याइपिं नेपाः व भारतीय व्यापारीयात खसी महयेत इनाप यानागु खँ कनादिसें उगु इलंनिसें स्वनिगलय् खसी आपूर्ति ठप्प जुयाच्वंगु जानकारी बियादिल ।

व्यापारी खड्गीया कथं स्वनिगलय् न्हिं न्यासः निसे खुसः खसीया माग जुइगु याः । तर ११ गते लिपा खसी आपूर्ति मजूगुलिं यानाः वंगु चैत १५ गते निसें हे कलंकीया खसी बजारय् खसी मदुगु खः ।

नेपालय् भारतया थीथी जिल्ला व नेपाःया हे तराई लागाया जिल्लां खसी आपूर्ति जुयाच्वंगु जानकारी बियादिसें लकडाउन लिपा धाःसा भारतं जक मखु नेपाःया जिल्लां तकं खसी आपूर्ति ठप्प जूगु खः ।

नेपाल माछा मासु व्यवसायी संघया उपाध्यक्ष उमेश खड्गीं नं बजारय् खसी मदुगुलिं यानाः थःगु पसः नं बन्द यायेमाःगु खँ कनादिल । खसीया ला थिके जुल धयागु खँय् वय्कलं खसिया ला हे न्यायेम दयेधुंकूगुलिं थिके–दंया खँ हे मदुगु धासें स्वनिगः जःखः तरकारी हइगु गाडीइ तुं छम्ह निम्ह खसी हयेगु यानाच्वंगु व अज्याःगु खसीया लाः धाःसा छुं भचा थिकेक मियाच्वंगु जुइफु धयादीगु दु ।

बजारय् वस्तु हे मदयेधुंकाः भाः थहां वन धायेगु उचित मजू धासें सुनां नं भाः थकायाः मियाच्वन धाःसा उकी संघ जिम्मेवारी मजुइगु खँ नं कनादिल । वय्कलं धयादिल, ‘बजारय् अभाव जुयाच्वंगु इलय् भाः थकयाः मीगु धइगु उचित मखु, यदि सुनां नं उकथं मिल धाःसा उमित सरकारं कारबाही यायेमाः ।’

संरक्षक खड्गीया कथं नेपालय् खसीया आपूर्ति न्हापा भारतय् निर्भर जुयाच्वंगु खःसा थौंकन्हय् धाःसा बछि धयाथें नेपालय् उत्पादन जुयाच्वंगु दु । वय्कःया कथं न्हापा ९० प्रतिशत खसी आपूर्ति भारतं जुइगु यानाच्वंगु खःसा थौंकन्हय् धाःसा ४५ निसे ५० प्रतिशत जक भारतं आयात जुयाच्वंगु दु ।

मेखे बजारय् खसी व मेय्या लाः अभाव जुयाच्वंगु दुसां नं खाया ला धाःसा न्यायेगु दु । बजारय् थौंकन्हय् खाया ला प्रतिकिलो २६० निसें २८० तकां मियाच्वंगु दु । व्यापारीतय् कथं खाया लाःया अभाव जुइगु संकेत तत्कालयात मदुसां नं लकडाउन ताःहाकः जुयावन धाःसा अभाव जुइफइगु खँ धाःगु दु । आःया निंतिं स्वनिगलय् उत्पादन जुयाच्वंगु खां हे बजाः धाने यानाच्वंगु खँ धासें व्यापारीतय्सं लक डाउन ताःहाकः जुल धाःसा स्वनिगःया उत्पादनं जक बजाः फये मफइगु खँ धाःगु दु ।

स्वनिगलय् विशेष यानाः चितवनं खा आपूर्ति जुयाच्वंगु खःसां नं लकडाउन लिपा म्हो जक खाः वयाच्वंगु दु । लिसें खायात नकेमाःगु दानाया अभाव जुयाः गुलिखे किसानतय्सं चल्ला हे स्यानाः ल्हाकेगु यानाच्वंगुलिं लकडाउन चायेधुंकाः धाःसा बजारय् खाःया ला अभाव जुइफइगु खँ धाःगु दु ।

सम्बन्धित बुखँ

LEAVE YOUR COMMENTS