कोरोनाया खोप प्रभावकारी

येँ -नेपालय् कोरोनाया निगूगु लहर व्यापक जुया वयेवं कोरोना विरुद्धया खोप काइपिं मनूत नं अप्वया वंगु दु । शुरुइ थ्व खोप कायेत आपालं मनूत ग्याःगु खःसां आः वयाः खोप काये माल धकाः आपालं मनूतय्सं धाः वयाच्वंगु सीदुगु दु ।

थीथी अस्पतालय् कार्यरत स्वास्थ्य– कर्मीतय्सं धाः कथं कोरोना विरुद्धया थ्व खोप वास्तवय् ज्या लगे जू धयागु खँ थौंकन्हय् पुष्टि जुयाच्वंगु दु । न्हापा कोरोनां ल्वचं कयाः गुलिखे डाक्टर व नर्सत तकं विरामी जुइगु व मृत्यु तकं जूगु खःसां थुगुुसी धाःसा डाक्टर व नर्सत विरामी जुल वा मृत्यु जुल धइगु खबर वःगु मदुनि ।

विरामीया उपचार यायेगु झ्वलय् आपालं डाक्टर व नर्सत थःपिं हे कोरोना संक्रमित जूगु दु । तर उमित उकिया लिच्वः धाःसा न्हापा थें ग्यानापु मजू । न्यान्हु खुन्हु छेँय् आइसोलेसनय् च्वनेवं उमिगु ल्वय् लनावंगु खनेदु ।

न्हापाया महामारीइ कोरोना मजूपिं अप्वः थें डाक्टर व नर्सत थुगुसी कोरोनाया शिकार जूगु दु । तर उमित न्हापायापिंत थें उलि सास्ती जूगु खने मदुगु खँ धाःगु दु । कोरोना जुइवं न्यान्हु खुन्हु छेँय् च्वनाः उपिं हानं ड्यूटी याः वयाच्वंगु खँ वीर अस्पतालय् कार्यरत छम्ह स्वास्थ्यकर्मीं कंगु दु ।

अथे हे गुलिं स्वास्थ्यकर्मीतय्त दोहोरे जुयाः नं संक्रमण जूगु दु । तर उमित नं खोप कया तयेधुंकूगु कारणं न्हापा थें सास्ती मजू । थ्व स्वयां न्ह्यः कोरोना दोहोरे जुयाः वल धाःसा लंकेत तसकं थाकुइ धयातःगु खः ।

कोरोना विरुद्धया खोप प्रभावकारी खने दया वःगुलिं आः थ्व खोप काये माल धकाः यक्वस्यां माग याना हःगु दु । न्हापा काये मखु धाःपिं तकं आः गन खोप बी धकाः माः जुयाच्वंगु खँ येँ मनपाया छम्ह वडा अध्यक्षं कनादिल । स्थानीय तहतय्सं निगूगु डोजया खोप बीगु ज्या न्ह्याकाच्वंगु दु ।