सुकुम्बासीबारे बालेनया लिसः
येँ (नेपालभाषा टाइम्स)÷येँ महानगरपालिकाया मेयर बालेन साहं उच्च अदालत यलय् सुकुम्बासी वस्ती चीकेगु बारे थःपिनि लिखित लिसः पेश यानादीग दु ।
सुकुम्बासी वस्ती चीकेगु विषयय्महानगर विरुद्ध लाःगु रिटया सुनुवाइ यासें अदालतं वंगु चैत १७ गते सुकुम्बासी वस्ती तत्काल मचीकेत अल्पकालीन अन्तरिम आदेश बिउगु खः । येँमनपां वंगु चैत ११ गते सुचं पिथनाः खुसि सिथय्, खुसिं त्वःतातःगु थाय् व खुसि बाः वनाच्वंगु क्षेत्रय् दयेकातःगु अनधिकृत संरचना न्हय्न्हुया दुने चीकेत इनाप यायेवं महानगर विरुद्ध रिट लाःगु खः ।
मेयर साहं बिउगु लिखित लिसलय् महानगरयात ऐतिहासिक, धार्मिक व सांस्कृतिक सम्पदा, नेवाः सभ्यता राष्ट्रिय सम्पत्ति व स्रोत साधनया संरक्षण यायेगु दायित्वं बिमुख यायेगु उद्देश्यं रिट निवेदन तःगु खँ धयादीगु दु ।
लिसलय् धयातःगु दु, ‘गैरसुकुम्बासी योजनाय् कानुन ल्हातय् कायेगु, खुसिया जग्गा कब्जा यायेगु, स्वीकृति मकासें पक्की, छेँ, टहरा, सटक कवः दयेकेगु, न्या–मी यायेगु, बालं तयेगु, राज्य संयन्त्रयात अनुगमन याके मबीगु, सर्वोच्च अदालतया आदेश कार्यान्वयन याके मबीगु, घरेलु ल्वाभः विस्फोटक पदार्थ सहित आपराधिक बल छ्यलेगु, उगु क्षेत्रय् सतक, धः दयेकेगु, सरसफाइ व धः प्रशोधन प्लान्ट, सम्पदा संरक्षण, शहरी सौन्दर्यीकरणया गुगुं नं ज्या याके मबीगु थेंज्याःगु कानुनं बर्जित ज्याखँतय्त समर्थन याइगु विपक्षीया रिट निवेदनया मनसायय् न्ह्यसः ब्वलनाच्वंगु दु ।’
LEAVE YOUR COMMENTS