निन्हु विदा स्कुलयात अव्यवहारिक

येँ- सरकारं लागू याःगु वालय् निन्हु बिदा बीगु व्यवस्थायात स्कुल व कलेजतय्सं कार्यान्वयन याये मफइगु खँ धाःगु दु । खास यानाः निजी स्कुल व कलेजतय्सं वालय् निन्हु बिदा बीगु थ्व व्यवस्थां सरकारी ज्याकूयात अःपुका बिउसां स्कुल कलेजया विद्यार्थीतय्त धाःसा थाकुइकीगु खँ धाःगु दु । मोडर्न नेवाः इंग्लिस स्कुलया प्रिन्सिपल दिपक तुलाधरं वालय् निन्हु बिदा बीगु व्यवस्था स्कुल कलेजया लागिं व्यवहारिक मजुइगु खँ कनादीगु दु । वय्कलं सामाजिक सञ्जाल मार्फत हे थःगु बिचाः तयादिसें थुकियात कयाः पुनर्विचार यायेमाःगु खँ धयादीगु दु ।

अथे हे काठमाडौं मोडेल स्कुलया प्रिन्सिपल राजेन्द्र महर्जनं नं वालय् निन्हु बिदा बीगु ज्या विद्यालयया हकय् व्यावहारिक मजू धासें थुकियात कयाः पुनर्विचार यायेमाःगु खँ धयादीगु दु । थ्व व्यवस्थां यानाः थीथी समस्या पिकायेफु धासें सरकारं थुकिया बारे बिचाः यायेमाःगु तर्क नं वय्कलं तयादीगु दु ।

वालय् निन्हु बिदा बीबलय् स्कुलया कोर्स पूवंकेत थाकुइगु व थुकिं यानाः विद्यार्थीयात मानसिक दबाव लाः वनीगु खँ निजी विद्यालयतय्सं धयाहःगु दु । निन्हु बिदाया कोटा पूवंकेत कार्यालयया ई सुथय् व सनिलय् थपे यानाः समायोजन याये जिउसां विद्यार्थीतय् कक्षाया ई धाःसा अथे याये मफइगु जूगुलिं थुकिं समस्या जुइगु खँ शिक्षकतय्सं धयाहःगु दु ।

सरकारं सरकारी खर्च बचे यायेगु, चिकं आयात यायेबलय् विदेश वनीगु ध्यबा म्हो चायेकेगु आदि कारण न्ह्यःने तयाः वालय् निन्हु बिदा बीगु व्यवस्था याःगु खः । तर थुकिं विद्यालय लगायत निजी क्षेत्रया मेमेगु पेशाय् नं समस्या वइगु खँ धायेगु याना हःगु दु ।