बाकुननी पुचःया हनेज्या

येँ – येँ मनपा वडा नं. २१ स्थित बाकुननिइ बाकुननि पुचःपाखें २१ वडाव्यापी एसइइ परीक्षाय् उत्तीर्ण जूपिंत हनेगु ज्या जुल ।

संघीय संसदया दुजः कृष्णगोपाल श्रेष्ठ मूपाहांकथं झायादीगु ज्याझ्वलय् विशेष पाहांकथं प्रदेश ३या सांसद अजयक्रान्ति शाक्य, येँ महानगरपालिकाया मेयर विद्यासुन्दर शाक्य झायादीगु खः । ज्याझ्वलय् एसइइ परीक्षा उत्तीर्ण जुयादीपिं २१ वडाया ५६ म्ह विद्यार्थीपिंत सम्मान यायेगु झ्वलय् मूपाहां संघीय सांसद श्रेष्ठं दसिपौ लःल्हानादीगु खः । अथे हे येँ मनपाया मेयर विद्यासुन्दर शाक्यं खादा क्वखायेकादीगु खःसा प्रदेश सांसद शाक्यं मेडल क्वखायेकादीगु खः ।

एसइइ उत्तीर्ण ५६ म्ह विद्यार्थीमध्ये गोलाप्रथां ९ म्ह विद्यार्थीपिंत विशेष सिरपाः नं लःल्हाःगु उगु ज्याझ्वलय् नवासें येँ मनपारया मेयर शाक्यं शिक्षाया महत्वया विषययात कयाः थःगु नुगःखँ तयादीगु खः ।

सरकारी शिक्षा नीतिया बारे जानकारी बियादिसें वय्कलं विद्यार्थीतय्सं उच्च शिक्षा हासिल यायेगु झ्वलय् थम्हं भविष्यय् गज्याःगु लजगाः यायेगु, गज्याःगु पेशा यायेगु व उकिया निंतिं छु गज्याःगु शिक्षा गुलि आवश्यक जू धइगु बारे नं जानकारी बियादीगु खः ।

बाकुनी पुचःया नायः गौतम प्रधानं लसकुस यानादीगु ज्याझ्वलय् छ्याञ्जे रविन महर्जनं पुचःया प्रगति विवरण सार्वजनिक यानादीगु खःसा न्वकू कविन्द्र महर्जनं सुभाय् देछानादीगु खः ।

सम्बन्धित बुखँ

LEAVE YOUR COMMENTS