नेवाः पासा पुचः स्पेनया भिंतुना कालबिल व म्हपुजा

येँ – नेवाः पासा पुचः स्पेन, म्याड्रिडया ग्वसालय् नेपाल संवत् ११३९ न्हूदँया लसताय् भिंतुना कालबिल, कौला ज्याझ्वः व म्हपुजा ज्याझ्वः जुल । स्पेनया निंतिं नेपाःया राजदूत भरतबहादुर रायमाझी मूपाहांकथं झायादीगु ज्याझ्वः संस्थाया नायः सुरेशमान सिंह डंगोलया सभापतित्वय् न्ह्याःगु खःसा दुजः मय्जु सुन्दरी लामा शाक्यं लसकुस यानादीगु खः ।

राजदूत रायमाझीं नेवाः समुदाय संस्कृति, जात्रा, पर्व, नखःचखः हनेगुलिइ जक मखसे नसाज्वलं व व्यापार यायेगुलिइ नं उलि हे नांजाःगु जक मखसे थ्व सकता ख्यलय् उतिकं तःमि जूगुलिं स्पेनय् नं थुकियात च्वन्ह्याका यंकेगु नापं थःगु रीतिरिवाज संस्कृतियात निरन्तरता बिया वनाच्वने फयेमा धकाः भिंतुना बियादिल ।

स्पेनय् च्वनाच्वंपिं नेवाः लगायत मेमेगु समुदायया नं उल्लेख्य सहभागिता दुगु भिंतुना कालबिल ज्याझ्वलय् संस्थाया नायः डंगोलं न्हूदँया लसताय् भिंतुना देछायेगु झ्वलय् नेपाल संवत्या महत्वया बारे ध्वाथुइकादीगु खः ।

ज्याझ्वलय् पाहांकथं एनआरएनया दांभरिं गोपाल शिल्पकार, अन्तर्राष्ट्रिय नेपाली साहित्य समाज, स्पेन च्याप्टरया छ्याञ्जे पार्वती ओली व नेवाः पासा पुचः स्पेन, म्याड्रिडया संस्थापक दुजः अनुपराज शिल्पकारपिं झायादी खः ।