दान्यहिरा सिरपाः लःल्हात

यल- नेपालभाषा एकेदेमिं दँय्दसं बिया वयाच्वंगु दान्यहिरा सिरपाः थुगुसी समालोचक प्राध्यापक माणिकलाल श्रेष्ठयात लःल्हाःगु दु । म्हिगः छगू ज्याझ्वः यासें एकेदेमिया संरक्षक वाङ्मय शताब्दीपुरुष सत्यमोहन जोशीं वय्कःया कायः डा. सितुलाल श्रेष्ठयात सिरपाः लःल्हानादिल । प्रा. श्रेष्ठ उसाँय् मदयाः अस्पताल भर्ना जुयाच्वनादीगुलिं वय्कःया कायं सिरपाः लःल्हानाः कयादीगु खः । ज्याझ्वलय् एकेदेमिया चान्सलर चित्तरञ्ज नेपालीं सिरपाः त्याकादीपिंत स्वां लःल्हानादीगु खःसा दाता व एकेदेमिया उपकुलपति यज्ञरत्न धाख्वां दां सिरपाः लःल्हानादीगु खः । दान्यहिरा सिरपाः न्यय्द्वः तकाया खः ।

अथेहे दान्यहिरा हःपाः सिरपाः व दान्यहिरा विज्ञान प्रविधि हःपाः सिरपाः छसिकथं पत्रकार साहित्यकार नजरराम महर्जन व नेपाःया न्हापांम्ह कम्प्युटर निर्माता मुनिबहादुर शाक्ययात लःल्हाःगु दु । थ्व निगुलिं सिरपाः नीन्याद्वः नीन्याद्वः तकाया खः । थुगुसीनिसें दाता यज्ञरत्न धाख्वां थःत यःगु छपु म्येँया गायक वा संगीतकारयात दँय् झिद्वः तकाया सिरपाः लःल्हायेगु नं सुरु यानादीगु दु । थ्व पालय् न्हापांखुसी गायक सुरजवीर वज्राचार्ययात थ्व सिरपाः लःल्हाःगु खः ।

अथेहे दाता धाख्वाःया नेपालभाषाया बाखंमुना सफू ‘इस्तानबुलया सतक बञ्जाः’ नं मूपाहां सत्यमोहन जोशीं उलेज्या यानादीगु खः ।

सम्बन्धित बुखँ

LEAVE YOUR COMMENTS