निगूगु तहया नेतात ओलीयाथाय्
येँ – माधव नेपालया पक्षया धाःपिं, तर नेपालं दयेकूगु पार्टीइ मवंपिं निगूगु तहया नेतात धाःपिं सकलें आः एमालेय् हे च्वनीगु जूगु दु । एमाले अध्यक्ष केपी ओली लिसे सोमवाः च्वंगु बैठकय् ओली १० बुँदे सहमति कार्यान्वयन यायेत सहमत जुइवं भीम रावल, अष्टलक्ष्मी शाक्य, गोकर्ण विष्ट, योगेश भट्टराई, घनश्याम भुसाल, सुरेन्द्र पाण्डे, रघुजी पन्त लगायतया नेतात एमालेय् हे च्वनीगु जूगु खः ।
थुपिं नेतातय्सं ओलीयात मंगलवाः दुने १० बुँदे कार्यान्वयन मयात धाःसा थःपिं नेपालया पार्टीइ वनेगु जुइ धकाः अल्टिमेटम बिउगु खः । नेपाल पक्षं निर्वाचन आयोगय् दर्ता याःगु नेकपा (समाजवादी) पार्टी दर्ताया निंतिं बुधवाः सनाखत यायेगु ज्या जुइत्यंगुलिं मंगलवाः दुने निर्णय यायेत अल्टिमेटम बियातःगु खः ।
अल्टिमेटम बियातःगुया छन्हु न्ह्यः जूगु बैठकय् ओलीं १० बुँदे कार्यान्वयन यायेत सहमत जुसें पार्टीयात २०७५ जेठ २ गतेया अवस्थाय् लित हयेगु प्रतिवद्धता प्वंकूगु खः । थुकिया लिसें १० बुँदे कार्यान्वयनया मोडालिटी दयेकेत थौं बुधवाः हे स्थायी कमिटीया बैठक सःतेत तयार जूगु खः । ओली १० बुँदे कार्यान्वयन यायेत सहमत जुइवं थुपिं नेतात ओलीं सःतूगु स्थायी कमिटीया बैठकय् वनेत तयार जूगु खः ।
ओली १० बुँदेय् सहमत जुइवं एमालेया सचिव जुयाच्वंम्ह नेपाल पक्षया नेता योगेश भट्टराईं नेपालं पार्टी चायेकेत हथाय् चाःगु व थःपिंत छुं सल्हा हे मयासे पार्टी दर्ता याःवंगुलिं थःपिं नेपाल पक्षय् वनेमफइगु खँ धाःगु दु ।
थःपिं अझ नं माधव नेपाल सहित एकताया पक्षय् दुगु धासें वय्कलं नेता नेपाल स्थायी कमिटी व केन्द्री कमिटीया नेतात लिसे सहलह हे मयासे पार्टी दर्ताय् वंगु द्वपं बियादीगु खः । वय्कलं ओलीलिसे जूगु बैठकय् नेपालया न्हूगु पार्टी दर्ता प्रक्रिया दिकेत व एमालेय् हे लिहां वयेत इनाप यायेगु व थ्व अवस्थाय् झिंप्यम्ह सांसदतय्त याःगु कारवाही नं दिकेगु प्रतिबद्धता प्वंकूगु खँ नं धयादीगु दु ।
मेखे ओली पक्षया नेता प्रदीप ज्ञवालीं धाःसा नेता नेपालं बिस्कं हे लँ ज्वनेधुंकूगुलिं वय्कःया बारे आः बिचाः यानाच्वनेमाःगु आवश्यक मदु धयादीगु दु ।
LEAVE YOUR COMMENTS