कोरोना भाइरस संक्रमणं विश्वय् न्यागू लाख ७५ हजारया मृत्यु
एजेन्सी – कोरोना भाइरस (कोभिड १९) संक्रमणं विश्वन्यंकं सीपिनि ल्याः न्यागू लाख ७५ हजा ९५५ म्ह थ्यंगु दु। अथेहे विश्वन्यंकं थ्व भाइरस संक्रमण जूपिनि ल्याः १ करोड ३२ लाख ४२ हजार थ्यंगु दु। थ्व विश्व स्वास्थ्य संगठनं पितबीगु मंगलवाः तकया तथ्यांक खः ।
मंगलवाः न्हिनतय् तक वःगु तथ्यांक कथं कोरोना भाइरसया कारणं विरामी जूपिं ७७ लाख ९ हजार ९७२ म्ह ल्वय् लंकाः छेँय् लिहां वनेधुंकूगु दु। थौंकन्हय् विश्वय् कोरोना भाइरस संक्रमितत ल्याः ४९ लाख ५५ हजार १४२ म्ह दु। संक्रमितत मध्ये ५९ हजार २०९ म्ह गम्भीर अवस्था दुगु खँ धाःगु दु ।
थगुने डिसेम्बरया अन्त्य पाखे चीनया वुहान शहरय् दकलय् न्हापां खनेदुगु कोरोना भाइरस संक्रमणं दकलय् अप्वः अमेरिका हे प्रभावित जुयाच्वंगु दु। डब्ल्यूएचओया कथं अमेरिकाय् जक ३४ लाख ९७ हजार ४८३ म्हेसित कोरोना संक्रमण जूगु दु। थ्व प्रकोपया कारणं अमेरिकाय् १ लाख ३८ हजार २४७ म्हेसिया ज्यान वनेधुंकूगु दु ।
अथेहे दक्षिण अमेरिकाय् २९ लाख ३१ हजार ९५९ म्ह कोरोना संक्रमितत थ्यनेधुंकूगु दु। थन नं १ लाख ६ हजार ४९९ म्हेसिया ज्यान वनेधुंकूगु दु। अथेहे उत्तर अमेरिकाय् ४० लाख ७५ हजार ५९४ म्हेसिके कोरोना खनदुगु दुसा थन १ लाख ८७ हजार १२२ म्हेसिया ज्यान वनेधुंकूगु दु। युरोपय् आःतक २५ लाख ९३ हजार ५५८ म्हेसिके कोरोना संक्रमण खनेदुगु दुसा १ लाख ९६ हजार ५८१ म्हेसिया ज्यान वंगु दु ।
अथेहे एशियाय् ३० लाख २० हजार ८०२ म्हेसिके संक्रमण खनेदुगु दुसा ७१ हजार ४४४ म्हेसिया ज्यान वंगु दु। अफ्रिकाय् ६ लाख १४ हजार ४३६ म्हेसिके संक्रमण खनेदुगु दुसा १३ हजार ५०३ म्हेसिया ज्यान वंगु दु। ओसियानाय् ११ हजार ९१५ म्हेसिके कोरोना संक्रमण खनेदुगु दुसा १३० म्हेसिया ज्यान वंगु दु ।
LEAVE YOUR COMMENTS