बुंगद्यःया रथ दयेकेगु ज्या न्ह्यात

यल(नेपालभाषा टाइम्स)- देय्या हे दकलय् ताःहाकःगु जात्राकथं कयातःगु बुंगद्यःया जात्राया तयारी न्ह्याःगु दु । बुंगद्यःया रथ दयेकेगु ज्यालिसें जात्राया तयारी न्ह्याःगु खः ।

चौलागा पारुकुन्हु पूच्वय् हाम्वः की तानाः बुंगद्यःया रथ दयेकेगु ज्या न्ह्याकूगु खः । पारुकुन्हु हाम्वः की तानाः कन्हय्कुन्हुनिसें रथया ज्या न्ह्याकेगु परम्परा दया वयाच्वंगु दु । थ्व ल्याखं वंगु आइतवाः हाम्वः की तानाः सोमवाःनिसें रथ निर्माणया ज्या न्ह्याकूगु खः ।

थ्व हे झ्वलय् थुगुसी बुंगद्यःया रथय् न्हूगु घःमाः तइगु जूगु दु । रथय् तइगु न्हूगु घःमाः दयेकेगु ज्या नं न्ह्यायेधुंकूगु दु । बुंगद्यःया रथय् झिंनिदँय् छक्वः बुंगंनिसें रथ साला हइगु इलय्, घःमाः स्यन, ज्या मबिल वा मेगु छुं कथंया घःमाय् समस्या वःसा जक न्हूगु दयेकाः तयेगु परम्परा दु ।

पुलांगु घःमाःपाखें ज्या काये फइगु अवस्थाय् मदयेवं थुगुसी न्हूगु घःमाः तयेगु निंतिं ज्या न्ह्याकूगु खः । आः दुगु घःमाःपाखें ज्या काये मफइगु व जोखिम नं आपालं दुगुलिं न्हूगु घःमाः दयेकाः तयेत्यंगु खः ।

बुंगद्यःया रथ दयेकेगु तयारीया झ्लवय् जावलाख्यलय् तयातःगु रथया घःचाः पूच्वय् थ्यंके हयेधुंकूगु दु । थुगुसी वइगु बछलाथ्व पारु (बैशाख १८) कुन्हु बुंगद्यःयात रथय् बिज्याकीगु व वयां प्यन्हु लिपा बछलाथ्व तुतिया (बैशाख २१) निसें रथ साला जात्रा शुरु याइ ।
बुंगद्यःया जात्राया न्हापांगु न्हि पूच्वं रथ सालाः गाःबहालय् याः न्यायेकी ।

सम्बन्धित बुखँ

LEAVE YOUR COMMENTS