न्यू जेनिथं क्रिकेट रंगशालायात ग्वाहालि बीगु
येँ – न्यू जेनिथ इंग्लिस स्कूलं चितवनय् धुर्मूस सुन्तलीं दयेकेत्यंगु अन्तर्राष्ट्रिय क्रिकेट रंगशालाया निंतिं ग्वाहालि याइगु जूगु दु । स्कूलया २० क्वःगु अभिभावक दिवसया झ्वलय् स्कूलया संस्थापक प्रिन्सिपल राजु महर्जनं रंगशालाया निंतिं ग्वाहालि बीगु घोषणा यानादीगु खः ।
स्कूलं थुगुसी पिथंगु म्याग्जिन मियाः वःगु ध्यबाया लिसें प्रिन्सिपल महर्जनं व्यक्तिगत रुपं झिद्वः व स्कूल व अभिभावकपाखें मुंगु थप ध्यबा तयाः धुर्मूस सुन्तलीयात लःल्हायेगु जानकारी बिउगु खः ।
ज्याझ्वलय् मूपाहां येँ महानगरपालिका १८ वडाया अध्यक्ष न्हुछेकाजी महर्जन लिसें प्रिन्सिपल महर्जन व पाहाँपिंसं स्कुलया म्याग्जिन विमोचन यानादीगु खः । अभिभावक दिवसय् प्रिन्सिपल महर्जनं स्कुल गुकथं नीदँतक न्ह्याःवन धयागु बारे कविता हे च्वयाः न्यंकादीगु खः ।
महर्जन लिसें खुम्हेसिनं नीदँ न्ह्यव सुरु याःगु स्कुलय् थौं पीम्हं मल्याक शिक्षकशिक्षिका, कर्मचारी दुगु, द्वःछिं मल्याक विद्यार्थी थ्यंगु, सामान्य भवनं सुरु जूगु स्कुलया थौं न्याखा भवन दयेकेधुंकूगु जानकारी वय्कलं बियादीगु खः ।
थ्व झ्वलय् स्कुलय् दकलय् न्हापां भर्ना जूपिं निम्ह विद्यार्थीपिंत नं सम्मान याःगु खःसा स्कुलं झिन्यादँ तक मदिक्क सेवा यानादीपिं शिक्षक कर्मचारीपिंत नं मूपाहाँ महर्जनं सम्मान यानादीगु खः । अभिभावक दिवसय् स्कुलय् विद्यार्थीपिंसं हुलाप्याखं, कासा, म्येँ आदि नं न्ह्यब्वयादीगु खः ।
LEAVE YOUR COMMENTS