ने. सं. ११४४ कौलाथ्व चौथी -

पं. निष्ठानन्द वज्राचार्यया १६७ क्वःगु बदिं हनाज्याझ्वः

येँ (नेपालभाषा टाइम्स)- नेपालभाषाया प्यंगःथां मध्ये छगः थां पं. निष्ठानन्द वज्राचार्यया १६७ क्वःगु बुदिं हना ज्याझ्वः वंगु शनिवाः जुल । निष्ठानन्द स्मृति गुथि व ओलम्पस क्लया मंकाः ग्वसालय् जूगु उगु ज्याझ्वलय् बागमती प्रदेश सभाया सासंदपिंलिसें आपालं भाषिक कार्यकर्ता, थीथी राजनीतिक व्यतिmत्वपिंसं ब्वति काःगु खः । ज्याझ्वलय् सहभागीपिंसं ओमबहाःस्थित नःबहिलिइ च्वंगु पं. निष्ठानन्दया झ्वाताय् स्वां देछानादीगु खः ।

ज्याझ्वःयात लसकुस यासें ज्याझ्वःया सभापति नेवाः देय् दबूया केन्द्रीय नायः व ओलम्पस क्लबया नायः पवित्र वज्राचार्यं ‘झीगु भाषायात राज्यं सलंसः दँ निसें दमन यानातःगु हुनिं यानाः झी दथुइ हे झीगु भाय् तना वन । तर थौं वयाः उगु इलंनिसें झीसं न्ह्याकाच्वनागु झीगु आन्दोलन लिच्वः कथं थुगुसी बागमती प्रदेशं नेवाः भाय्यात नं आधिकारीक भाषा धकाः घोषणा याये धुंकूगु दु । उकिया निंतिं बागमती प्रदेशया सांसदपिंत झी सकस्यां सुभाय् नं बी धुनागु दु । वय्कःपिंसं यायेमाःगु ज्या याये धुंकल, आः जिम्मेवारी झीगु ल्हाःतय् वःगु ।’

वय्कलं धयादील, ‘न्हापा सरकारं अधिकार मबिउनिगु कारणं भाय् त्वःते माल धयागु छगू त्वह जुयाच्वंगु खःसा आः सरकारं व अधिकार बी धुंकूसेलिं झीसं झीगु भाय् ल्यंकेगु ज्या यायेमाल । उकिं म्होतिं नंं झी मस्तय्त छेँय् थःगु भासं खँ ल्हाकेमाःगु दु ।’

ज्याझ्वलय् मूवक्ता न्हूदँ समारोह समितिया नायः प्रा. डा. नरेशमान वज्राचार्यं पं. निष्ठानन्द व वय्कलं च्वयादीगु ललितविस्तरयात कयाः चर्चा यायेगु झ्वलय् धयादिल, ‘निष्ठानन्द धयाम्ह साधारण व्यक्ति मखु, गुगु इलय् नेपालभाषा च्वयेगु धइगु हे सरकारया नजरय् अपराध सरह जुइ, उगु इलय् नेपालभाषां ललितविस्तर ग्रन्थ च्वयेगु व वयात छापे यायेगु धयागु तःधंगु हे ज्या खः । ज्यानया प्रवाह मयासे यायेगु ज्या खः । उकिं थौं कन्हय् झीसं नवाना छुं फुइँ यायेगु ? जि थथे नवाये सः उथे नवासे, जिं थथे धकाः ब्वःबियाः अथे धकाः ब्वःबियाः, थथे धकाः ब्यंगः नका, थथे धकाः माग तया, थथे धकाः जुलुस वनाः धायेगु तःधंगु खँ मखयेधुंकल । छाय् धाःसां आः आः झीसं न्ह्याःगु धाःसां ज्यान बी म्वाः । उगु बखतय् ज्यान बियाः ज्या यायेगु धयागु ला झीसं गुबलें नं कल्पना हे याये फइमखु । उगु बखतय् वय्कलं गुकथं मेहनत यानादिल धयागु ला वय्कलं यानादीगु योगदानयात चर्चा याना गबलें क्वचाइमखु ।’