५ वडालिसे त्रिपक्षीय सम्झौता
येँ(नेपालभाषा टाइम्स)- येँ महानगर पालिका १५ वडा, स्वयम्भू सामुदायिक अध्ययन केन्द्र व समुन्नत नेपाल दथुइ त्रिपक्षीय सम्झौता जूगु दु । स्वंगू पक्षया दथुइ थवंथवय् ग्वाहालि कालबिल यायेगु ल्याखं उगु सम्झौता जूगु खः ।
येँ महानगर उपप्रमुख सुनिता डंगोलया रोहवरय् जूगु सम्झौता पती १५ वडाअध्यक्ष ईश्वरमान डंगोल, केन्द्रया अध्यक्ष अर्जुन महर्जन व समुन्नत नेपालया कार्यकारी निर्देशक योगेशकुमार श्रेष्ठं ल्हाःचिं तयादीगु खः । सम्झौताकथं समुन्नत नेपालं युनिसेफलिसेया सहकार्यय् केन्द्रयात च्यागू लख तका दां आर्थिक ग्वाहालि याइ ।
स्वयम्भू सामुदायिक अध्ययन केन्द्र (सीएलसीं) विद्यालय वने मखंपिं वडाया मस्तय्त प्रारम्भिक शिक्षा बियाः विद्यालय भर्ना याना बीगु व १९ दँ च्वय्या ल्याय्म्हतय्त सीपमूलक तालिम बियाः राजगारीसहित व्यवस्थापन यायेगु याना वयाच्वंगु दु ।
उगु इलय् येँ महानगर उपप्रमुख डंगोलं अध्ययन केन्द्रं अझ अप्वः प्रभावकारी रुपं भूमिका म्हिते फयेमा धासें भिंतुना देछानादिल । लिसें वय्कलं केन्द्रयात वडां बीगु ग्वाहालि अप्वयेकूगु चर्चा यासें निरन्तर रुपं ग्वाहालि यायेगु प्रतिवद्धता प्वंकादिल ।
वडाअध्यक्ष डंगोलं विगतय् केन्द्रं याःगु ज्याया चर्चा यासें केन्द्र महानगरयात ग्वाहालि व तिबः बीगु सहयोगी संस्था जूगु खँ कनादिल ।
वय्कलं केन्द्रं वंगु न्हय्दँ न्ह्यःनिसें वडाय् थुकथंया ज्याझ्वः संचालन याना वयाच्वंगु धासें आतक करिब सछिम्हेसित व्यवस्थित यायेगु ज्या केन्द्रं यायेधुंकूगु वय्कलं कनादिल ।
समुन्नत नेपालया श्रेष्ठं शिक्षाया वैकल्पिक मार्ग चायेकेगु ज्याय् समन्वय याये खंगुलिं लसता वःगु खँ कनादिल । उगु इलय् महानगर उपप्रमख डंगोलं केन्द्रं उत्पादन याःगु थीथी ज्वलंया अवलोकन नं यानादीगु खः ।
LEAVE YOUR COMMENTS