ने. सं. ११४४ कछलागा द्वादशी -

गौरिकाया नामय् प्यंगू स्वर्णया कीर्तिमान

येँ- पौडीबाज गौरिका सिंहं झिंस्क्वःगु दक्षिण एशियाली कासाया स्वीमिङपाखे प्यंगू स्वर्ण त्याकाः न्हूगु इतिहास कायम याःगु दु । नेपाःया सुं नं कासामिं सागया छगू हे संस्करणय् प्यंगू स्वर्ण त्याकूगु मदुनि । सोमवाः जूगु १०० मिटर फ्रिस्टाइलय् स्वर्ण त्याकुसें गौरिकां थ्व इतिहास दयेकूगु खः । थ्वयां न्ह्यव आइतवाः जूगु ४ सय मिटर फ्रि स्टाइलय् स्वर्ण त्याकुसें गौरिकां स्वर्णय् ह्याट्रिक याःगु खः । अथेहे वंगु बिहिवाः २००मिटर फ्रि स्टाइलय् स्वर्ण त्याकुसें गौरिका दक्षिण एशियाली कासाय् स्वीमिङय् स्वर्ण त्याकूम्ह न्हापांम्ह नेपाःमि नं जूगु खः । गौरिकां मेगु स्वर्ण २०० मिटर ब्याकस्ट्रोकय् त्याकूगु खः ।

सोमवाः जूगु १०० मिटर फ्रिस्टाइलय् ५८.१३ सेकेन्डं दुरी पूवंकुसें स्वर्ण त्याकूगु खः । थ्व झ्वलय् वं भारतया शिवांगी शर्मायात ०.०२ सेकेन्डं लिउने लाकूगु खः । आइतवाः जूगु ४ सय मिटर फ्रिस्टाइलय् नं भारतया शिवांगीयात हे लिउने लाकाः स्वर्ण त्याकूगु खः । थ्व झ्वलय् गौरिकां ४ मिनेट २५.२८ सेकेन्डं दूरी पूवंकूगु खःसा शर्मां ४ मिनेट २६.२२ सेकेन्डं दूरी पूवंकूगु खः । गौरिका १०० मिटर ब्याकस्ट्रोकय् धाःसा १ सेकेन्डं लिउने लानाः स्वर्ण त्याकेत असफल जूगु खः । थ्व प्रतिस्पर्धाय् भारतया मन्ना राजीव पटेलं १ मिनेट ०२.३५ सेकेन्डं दूरी पार याःगु खःसा गौरिकां १ मिनेट ०३.१५ सेकेन्डं पार याःगु खः । थ्व प्रतिस्पर्धाय् रजत त्याकेत ताःलाःम्ह गौरिकां ४०० मिटर रिलेय् नं नेपाली टिमलिसे जानाः कास्य पदक त्याकूगु खः ।

नेपाःया निंतिं ऐतिहासिक स्वर्ण त्याकूम्ह गौरिकायात धाःसा नेपाली हे मखु धाइपिं नं दु । थज्याःगु खं धाःसा व तसकं दुःखित जुयाच्वंगु दु । न्हापांगु स्वर्ण त्याकेधुंकाः वं धाःगु खः, ‘जि नेपाःमि खः, नेपाःया निंतिं स्वर्ण त्याकेदयाः जि तसकं लय्ताः ।’ वयात थथे नेपाली मखु धाइगु कारण धाःसा गौरिका बेलायतय् च्वनीगुलिं खः । मचां निसें बेलायतय् च्वनाच्वंम्ह गौरिकां लन्दनया क्याम्देन स्वीस कटेजय् एडम टेलरलिसे स्वीमिङ प्रशिक्षण कयाच्वंगु दु । तर गौरिकां धाःसा थःत नेपाःमि हे धकाः म्हसीका बिया वयाच्वंगु दुसा नेपालय् जुइगु राष्ट्रिय च्याम्पियनसीप लिसें मेमेगु हरेक धेंधेंबल्लाखय् ब्वति काः वयाच्वंगु दु ।

भारतय् जूगु झिंनिक्वःगु दक्षिण एशियाली कासाय् नं गौरिकां नेपाःया प्रतिनिधित्व याःगु खः । उबलय् छगू रजत व स्वंगू कास्य त्याकूगु खः । सन् २०१६ य् ब्राजिलय् जूगु रियो ओलम्पिकय् नं गौरिकां नेपाःया प्रतिनिधित्व याःगु खः । उबलय् ओलम्पिकय् म्हितःवःम्ह दकलय् चिधिकःम्ह कासामि जूगुलिं नं विश्वन्यंकं गौरिकाया नां बय्बय् जूगु खः । ओलम्पिक म्हितूबलय् वयागु उमेर १३ दँ २३५ न्हु जक थ्यंगु खः ।

गौरिका सन् २०२० य् जापानय् जुइगु टोकियो ओलम्पिकया निंतिं नं छनौट जुइधुंकूगु दु । गौरिकां थःगु लक्ष्य आः ओलम्पिकय् पदकय् त्याकेगु खँ धाःगु दु ।